AR Murugadoss: హిందీ సినిమాలపై మురుగదాస్ సంచలన వ్యాఖ్యలు
AR Murugadoss: వైవిధ్యమైన కథాంశాలతో ప్రేక్షకులను ఆకట్టుకునే దర్శకుడిగా పేరుగాంచిన ఏ.ఆర్. మురుగదాస్, తన తాజా చిత్రం ‘మదరాసి’ (శివకార్తికేయన్తో) ప్రచారంలో భాగంగా చేసిన వ్యాఖ్యలు ప్రస్తుతం సినీ వర్గాల్లో చర్చనీయాంశంగా మారాయి. ముఖ్యంగా హిందీ సినిమాల విషయంలో తనకు ఎలాంటి అవగాహన లేదని, అక్కడ పనిచేసేటప్పుడు తాను “దివ్యాంగుడిలా” భావిస్తానని మురుగదాస్ వ్యాఖ్యానించారు.
‘సికందర్’ అనుభవాలు, భాషా పరమైన సవాళ్లు
సల్మాన్ ఖాన్ హీరోగా మురుగదాస్ దర్శకత్వంలో ఇటీవల విడుదలైన ‘సికందర్’ ఆశించిన స్థాయిలో విజయం సాధించలేకపోయింది. ఈ సినిమా ఫలితంపై స్పందిస్తూ మురుగదాస్ భాషా సమస్యలను ప్రధానంగా ప్రస్తావించారు. “నా మాతృభాష తమిళంలో సినిమాలు చేయడం నాకు చాలా సులువుగా అనిపిస్తుంది. ఇక్కడి ప్రేక్షకులకు ఎలాంటి కథలు నచ్చుతాయో, సోషల్ మీడియాలో ఎలాంటి డైలాగులు వైరల్ అవుతాయో నాకు బాగా తెలుసు. యువత అభిరుచులపై నాకు అవగాహన ఉంది” అని ఆయన అన్నారు.
అయితే, ఇతర భాషల్లో పరిస్థితి పూర్తిగా భిన్నంగా ఉంటుందని మురుగదాస్ తెలిపారు. “తెలుగులో కొంతవరకు ఫర్వాలేదు. కానీ, హిందీ విషయంలో నాకు ఏమీ అర్థం కాదు. నేను స్క్రిప్ట్ను ఇస్తే, దాన్ని ముందు ఇంగ్లిష్లోకి, ఆ తర్వాత హిందీలోకి అనువదిస్తారు. నేను రాసుకున్న సన్నివేశంపై నాకు ఒక స్పష్టమైన ఆలోచన ఉంటుంది. కానీ, చిత్రీకరించే సమయానికి డైలాగుల విషయంలో గందరగోళం ఏర్పడుతుంది. అందుకే హిందీ చిత్రాలకు పనిచేసేటప్పుడు నేను దివ్యాంగుడిని అవుతాను” అంటూ వ్యాఖ్యానించారు. తన స్క్రిప్ట్, స్క్రీన్ప్లేలపై మాత్రమే ఆధారపడాల్సి వస్తుందని ఆయన పేర్కొన్నారు.
‘మదరాసి’పై భారీ అంచనాలు
శివకార్తికేయన్, ఏ.ఆర్. మురుగదాస్ కాంబోలో పాన్ ఇండియా స్థాయిలో రూపొందుతున్న ‘మదరాసి’ ప్రస్తుతం శరవేగంగా చిత్రీకరణ జరుపుకుంటోంది. రుక్మిణీ వసంత కథానాయికగా నటిస్తున్న ఈ చిత్రానికి అనిరుధ్ సంగీతం అందిస్తున్నారు. భారీ అంచనాల మధ్య ‘మదరాసి’ సెప్టెంబర్ 5న ప్రేక్షకుల ముందుకు రానుంది.