Ak-203 Rifle: భారత సైన్యం చేతికి అత్యాధునిక ‘AK-203 షేర్’ రైఫిల్స్
Ak-203 Rifle: శత్రు దేశాల నుంచి పెరుగుతున్న సవాళ్లను సమర్థంగా ఎదుర్కొనేందుకు భారత సైన్యం తన ఆయుధ సంపత్తిని నిరంతరం బలోపేతం చేసుకుంటోంది. ఈ క్రమంలో, దేశ రక్షణ సామర్థ్యాన్ని మరింత పెంచే లక్ష్యంతో రూపొందించిన అత్యాధునిక AK-203 అసాల్ట్ రైఫిల్స్ భారత సైన్యానికి అనుకున్న సమయం కన్నా ముందే అందుబాటులోకి రానున్నాయి.
ఉత్తర్‌ప్రదేశ్‌లోని అమేఠీలో భారత్‌-రష్యా సంయుక్త భాగస్వామ్యంతో ఏర్పాటైన ఇండో-రష్యన్ రైఫిల్స్ ప్రైవేట్ లిమిటెడ్ (IRRPL) వీటిని ‘షేర్’ పేరుతో తయారు చేస్తోంది. మొత్తం రూ. 5,200 కోట్ల ఒప్పందం ప్రకారం, 2032 అక్టోబరు నాటికి 6,01,427 ఏకే-203 రైఫిళ్లను అందించాల్సి ఉంది. అయితే, IRRPL సీఈఓ-మేనేజింగ్ డైరెక్టర్ మేజర్ జనరల్ ఎస్.కె. శర్మ తాజాగా వెల్లడించిన వివరాల ప్రకారం, ఈ ప్రాజెక్టు 22 నెలల ముందుగానే అంటే 2030 డిసెంబరు నాటికే పూర్తి కానుంది.
వేగం, కచ్చితత్వంలో అగ్రస్థానం!
ఈ ‘షేర్’ రైఫిళ్లు నిమిషానికి 700 రౌండ్ల వేగంతో కాల్పులు జరిపే సామర్థ్యాన్ని కలిగి ఉన్నాయి. అంతేకాకుండా, 800 మీటర్ల దూరం వరకు లక్ష్యాలను అత్యంత కచ్చితత్వంతో ఛేదించగలవు. ఇది సైనిక కార్యకలాపాల్లో మన బలగాలకు అపారమైన బలాన్ని అందిస్తుంది.
‘ఇన్సాస్’ స్థానంలో ‘షేర్’ ఆధిపత్యం!
దశాబ్దాలుగా భారత సాయుధ దళాలు వినియోగిస్తున్న ఇన్సాస్ రైఫిల్స్ స్థానంలో ఈ AK-203 లు రానున్నాయి. AK-47, AK-56 ల కంటే ఇవి ఎంతో అధునాతనమైనవి. సాంకేతికంగానూ మెరుగైనవి.
కాలిబర్: ఇన్సాస్ రైఫిల్ కాలిబర్ 5.56×45 ఎంఎం కాగా, ఏకే-203 కాలిబర్ 7.62×39 ఎంఎం. ఇది మరింత శక్తివంతమైన కాల్పులకు వీలు కల్పిస్తుంది.
బరువు: ఇన్సాస్ బరువు 4.15 కిలోలు కాగా, ఏకే-203 కేవలం 3.8 కిలోల బరువుతో తేలికగా ఉంటుంది. ఇది సైనికులకు కదలికలో సౌలభ్యాన్ని ఇస్తుంది.
పొడవు: AK-203 పొడవు 705 ఎంఎం (బట్ స్టాక్ లేకుండా) కావడం వల్ల సంకుచిత ప్రదేశాల్లోనూ సులభంగా ఉపయోగించవచ్చు.
మ్యాగజైన్: ఏకే-203 మ్యాగజైన్‌లో 30 క్యాడ్‌రిజ్‌లు పెట్టుకోవచ్చు.
అందించిన వివరాలు:
మేజర్ జనరల్ ఎస్.కె. శర్మ మాట్లాడుతూ, “ఇప్పటికే దాదాపు 48 వేల రైఫిళ్లను సైన్యానికి అందించాం. మరో రెండు నుంచి మూడు వారాల్లో అదనంగా 7 వేల రైఫిళ్లు సరఫరా అవుతాయి. ఈ డిసెంబరు నాటికి మరో 15 వేల రైఫిళ్లను డెలివరీ చేయాలని ప్లాన్ చేస్తున్నాం” అని తెలిపారు.
నియంత్రణ రేఖ (LoC), వాస్తవాధీన రేఖ (LAC) తో పాటు ఇతర సరిహద్దు ప్రాంతాల్లో పహారా కాస్తున్న మన సైనికుల చేతుల్లోకి ఈ అత్యాధునిక రైఫిళ్లు చేరితే, భారత బలగాల పోరాట సామర్థ్యం అద్భుతంగా పెరుగుతుందని రక్షణ రంగ నిపుణులు అభిప్రాయపడుతున్నారు. దేశ రక్షణకు ఇది ఒక కీలక మైలురాయిగా నిలవనుంది.