Raja Saab: సంక్రాంతికి రాబోతున్న ప్రభాస్ ‘రాజాసాబ్’ సినిమా..!
Raja Saab: ప్రభాస్ అభిమానులు ఎంతో ఆసక్తిగా ఎదురుచూస్తున్న ‘ది రాజా సాబ్’ చిత్రం విడుదలపై నెలకొన్న గందరగోళానికి తెరపడే అవకాశం కనిపిస్తోంది. మొదట డిసెంబర్ 5న విడుదల కావచ్చని వార్తలు రాగా, ఇప్పుడు సంక్రాంతి బరిలో నిలవాలని అభిమానులు కోరుకుంటున్నారని నిర్మాత టి.జి. విశ్వప్రసాద్ తెలిపారు. దీంతో సినిమా విడుదల తేదీపై సస్పెన్స్ మరింత పెరిగింది.
దర్శకుడు మారుతి రూపొందిస్తున్న ఈ హారర్ ఫాంటసీ చిత్రంలో ప్రభాస్ మునుపెన్నడూ చూడని పాత్రలో కనిపించనున్నారు. ఇటీవలే విడుదలైన మాళవిక మోహనన్ పోస్టర్లో విడుదల తేదీ లేకపోవడంతో, సినిమా వాయిదా పడుతుందనే ఊహాగానాలకు బలం చేకూరింది. అయితే, దీనిపై నిర్మాత విశ్వప్రసాద్ స్పందిస్తూ, తెలుగు అభిమానులు మరియు సినీ వ్యాపార వర్గాలు సినిమాను జనవరి 9న సంక్రాంతికి విడుదల చేయాలని కోరుకుంటున్నారని వెల్లడించారు. దీనికి భిన్నంగా, ఉత్తరాది ప్రేక్షకులు డిసెంబర్లో పెద్ద సినిమాలు లేని కారణంగా అప్పుడే విడుదల చేయాలని ఆశిస్తున్నారని ఆయన తెలిపారు.
సినిమా షూటింగ్ దాదాపు పూర్తయిందని, కేవలం కొన్ని పాటలు మాత్రమే చిత్రీకరించాల్సి ఉందని నిర్మాత వెల్లడించారు. మొత్తం 4.30 గంటల నిడివి ఉన్న ఫుటేజ్ను ఎడిట్ చేసి కుదించాల్సి ఉందని ఆయన చెప్పారు. ‘ది రాజా సాబ్’ అన్ని వర్గాల ప్రేక్షకులను అలరించే మాస్, క్లాస్ ఎలిమెంట్స్తో రూపొందిందని ఆయన ధీమా వ్యక్తం చేశారు. ఈ చిత్రంలో నిధి అగర్వాల్, మాళవిక మోహనన్, రిద్ధి కుమార్ కథానాయికలుగా నటిస్తుండగా, బాలీవుడ్ నటుడు సంజయ్ దత్ కీలక పాత్ర పోషిస్తున్నారు.
సినిమాలోని ప్రధాన ఆకర్షణల్లో ఒకటిగా నిలిచే రాజ్ మహల్ సెట్ను రూ. 7 కోట్లకు పైగా వ్యయంతో ప్రొడక్షన్ డిజైనర్ రాజీవన్ నిర్మించారు. ఈ భారీ సెట్ సినిమాకి సరికొత్త లుక్ తీసుకొస్తుందని చిత్ర బృందం పేర్కొంది. అంతేకాకుండా, ‘రాజా సాబ్ 2’ కూడా ఉంటుందని నిర్మాత చెప్పడం అభిమానుల్లో మరింత ఉత్సాహాన్ని నింపింది. ఈ సినిమా విడుదల తేదీపై అధికారిక ప్రకటన కోసం ప్రభాస్ ఫ్యాన్స్ ఆసక్తిగా ఎదురు చూస్తున్నారు.