Tollywood: టాలీవుడ్ సినీ కార్మికులు సమ్మె విరమించాలి.. చిత్రీకరణలు కొనసాగించాలన్న మంత్రి!
Tollywood: తెలుగు చిత్ర పరిశ్రమలో సినీ కార్మికుల వేతనాల వివాదంపై తెలంగాణ ప్రభుత్వం దృష్టి సారించింది. ఈ సమస్యను పరిష్కరించేందుకు చొరవ తీసుకున్న తెలంగాణ సినిమాటోగ్రఫీ శాఖ మంత్రి కోమటిరెడ్డి వెంకట్రెడ్డి, సమ్మె విరమించి చిత్రీకరణలు కొనసాగించాలని కార్మిక సమాఖ్య నాయకులను కోరారు. సచివాలయంలో నిర్మాతలు, కార్మిక సంఘాల ప్రతినిధులతో ప్రత్యేకంగా సమావేశమైన మంత్రి, ఇరు వర్గాలూ పట్టువిడుపులతో వ్యవహరించి సమస్యకు పరిష్కారం కనుగొనాలని సూచించారు.
ప్రత్యేక కమిటీ ఏర్పాటుకు ప్రతిపాదన
వేతనాల వివాదాన్ని పరిష్కరించేందుకు ఓ ప్రత్యేక కమిటీని ఏర్పాటు చేసుకోవాలని మంత్రి కోమటిరెడ్డి వెంకట్రెడ్డి ప్రతిపాదించారు. ఈ కమిటీ ద్వారా సమస్యలపై చర్చించి, సామరస్య పూర్వకమైన పరిష్కారం సాధించవచ్చని ఆయన అన్నారు. ఇరువర్గాల మధ్య చర్చలు సజావుగా సాగి, బుధవారం నుంచి సినిమా షూటింగ్లు తిరిగి ప్రారంభమవుతాయని ఆయన ఆశాభావం వ్యక్తం చేశారు. ఈ సమావేశంలో ప్రముఖ నిర్మాతలు దిల్రాజు, కె.ఎల్.దామోదర్ ప్రసాద్, సుప్రియ, జెమినీ కిరణ్, టి.ప్రసన్నకుమార్ తదితరులు పాల్గొన్నారు. వీరు చిత్ర పరిశ్రమలో నెలకొన్న పరిస్థితులను మంత్రికి వివరించారు.
ప్రభుత్వ సహకారం, హోం మంత్రి వ్యాఖ్యలు
మరోవైపు, ప్రభుత్వం సినీ కార్మికుల సమస్యలపై సానుభూతితో ఉందని, అదే సమయంలో పరిశ్రమలో ఇబ్బందులు లేకుండా చూసుకోవాల్సిన అవసరం ఉందని మంత్రి తెలిపారు. సినిమా పరిశ్రమకు హైదరాబాద్ ఒక ముఖ్య కేంద్రంగా ఉందని, ఈ బ్రాండ్ ఇమేజ్ను కాపాడేందుకు ప్రభుత్వం కట్టుబడి ఉందని అన్నారు. అంతేకాకుండా, సినీ కార్మికుల జీవన ప్రమాణాలను మెరుగుపరిచేందుకు గృహ వసతితో పాటు ఇతర మౌలిక సదుపాయాలు కల్పించాలనే ఆలోచనలో ముఖ్యమంత్రి రేవంత్రెడ్డి ఉన్నారని ఆయన వెల్లడించారు. ఎఫ్.డి.సి. ఛైర్మన్ దిల్రాజు మాట్లాడుతూ, హైదరాబాద్ను గ్లోబల్ ఫిల్మ్ హబ్గా మార్చాలనే ప్రభుత్వ ఆశయానికి అందరూ సహకరించాలని కోరారు.
కాగా సినీ కార్మికుల ఆందోళనలపై మంత్రి కోమటిరెడ్డి వెంకట్ రెడ్డి స్పందించారని తెలిసిందే. సినీ కార్మికుల వేతనాలను పెంచాల్సిన అవసరముందని మంత్రి కోమటిరెడ్డి అభిప్రాయపడ్డారు. సినీ ఇండస్ట్రీ అంశాలన్నీ దిల్ రాజుకు అప్పగించామని, సినీ కార్మికుల ఆందోళనపై దిల్ రాజు చర్చిస్తున్నారు. కార్మికుల డిమాండ్లపై చర్చించి నిర్ణయం తీసుకోవాలని పేర్కొన్నారు. మరి తాజాగా వరుస సమావేశాల నేపథ్యంలో కార్మికుల వేతన సమస్యలపై ఏమైనా పరిష్కారం లభిస్తుందా అనేది చూడాలి.