Actress Arya: తల్లీకి మరో పెళ్లి చేసిన కూతురు.. వైరల్ అవుతున్న మలయాళ నటి ఆర్య వివాహం
Actress Arya: సాధారణంగా తల్లిదండ్రులు రెండో వివాహం చేసుకోవడం పిల్లలు అంత సులభంగా అంగీకరించరు. కానీ, మలయాళ నటి ఆర్య విషయంలో మాత్రం ఒక అద్భుతమైన దృశ్యం ఆవిష్కృతమైంది. ఆమె రెండో పెళ్లికి అండగా నిలిచింది ఆమె 12 ఏళ్ల కూతురు రోయా. తల్లిని స్వయంగా వివాహ వేదిక వరకు తోడ్కొని వెళ్లిన రోయా, ఆర్య ముఖంలోని ఆనందాన్ని చూసి తనూ అంతే సంతోషంగా కనిపించడం అందరి హృదయాలను తాకింది. ఈ అపురూపమైన క్షణాలు ఇప్పుడు సోషల్ మీడియాలో వైరల్ అవుతున్నాయి.
ప్రముఖ యాంకర్, నటిగా మలయాళ సినీ పరిశ్రమలో గుర్తింపు పొందిన ఆర్య, నటుడు, కొరియోగ్రాఫర్ అయిన సిబిన్ బెంజమిన్ను వివాహం చేసుకున్నారు. వీళ్లిద్దరికీ ఇది రెండో పెళ్లి. ఈ ఏడాది మేలో నిశ్చితార్థం జరుపుకున్న ఈ జంట, ఇటీవల కుటుంబ సభ్యులు, సన్నిహితుల సమక్షంలో వివాహ బంధంలోకి అడుగుపెట్టారు. ఈ పెళ్లి వేడుకలో ఆర్య కూతురు రోయా ప్రత్యేక ఆకర్షణగా నిలిచింది. ఆమె తల్లికి అందించిన సహకారం, ఆనందం వెలకట్టలేనివి. ఈ ఫోటోలు, వీడియోలు ఇంటర్నెట్లో పెద్ద ఎత్తున షేర్ అవుతున్నాయి.
ఆర్య గతంలో ఐటీ ఇంజినీర్ రోహిత్ సుశీలన్ను వివాహం చేసుకోగా, వారికి రోయా అనే కుమార్తె ఉంది. 2019లో వీరు విడిపోయారు. ఆర్య మలయాళ బిగ్బాస్ సీజన్ 2లో పాల్గొని మంచి గుర్తింపు తెచ్చుకున్నారు. ఇక సిబిన్ బెంజమిన్ కూడా మలయాళ బిగ్బాస్ సీజన్ 6లో వైల్డ్కార్డ్ ఎంట్రీగా వచ్చారు.
ఇతనికీ గతంలో పెళ్లి కాగా, పిల్లలు కూడా ఉన్నట్టు సమాచారం. ఇప్పుడు ఆర్య, సిబిన్ కొత్త జీవితం ప్రారంభించారు. వీరు ఇద్దరూ ఇప్పుడు కొత్త జీవితాన్ని ప్రారంభించి, తమ అభిమానులకు శుభవార్త తెలిపారు. ప్రియమణి, పూర్ణ, అశ్వతి శ్రీకాంత్ వంటి పలువురు సినీ ప్రముఖులు ఈ నూతన జంటకు శుభాకాంక్షలు తెలియజేశారు.