Su From So: కథే అసలైన హీరో.. కూలీ, వార్ 2 కంటే ఈ చిన్న సినిమాకే లాభాలు ఎక్కువ!
Su From So: సినిమా పరిశ్రమలో ప్రస్తుతం భారీ బడ్జెట్, గ్రాండియర్‌ సెట్‌లు, పాన్ ఇండియా రిలీజ్‌ల హవా నడుస్తోంది. అయితే, ఈ హంగామాలో అత్యంత ముఖ్యమైన ‘కథ’ అనే అంశాన్ని చాలా మంది పక్కన పెట్టేస్తున్నారన్న విమర్శలు వినిపిస్తున్నాయి. ఈ ధోరణికి భిన్నంగా, కథాబలంతో చిన్న సినిమా కూడా సంచలనం సృష్టించగలదని ‘సు ఫ్రమ్ సో’ సినిమా నిరూపించింది. కేవలం రూ. 6 కోట్ల బడ్జెట్‌తో తెరకెక్కిన ఈ కన్నడ హారర్-కామెడీ చిత్రం, బాక్సాఫీస్ వద్ద రూ. 35 కోట్లు వసూలు చేసి అందరినీ ఆశ్చర్యపరిచింది.
ఆగస్టు 8న విడుదలైన ఈ సినిమా, పెద్దగా ప్రచారం లేకుండానే ప్రేక్షకులను పలకరించింది. కానీ, మొదటి రోజు నుంచే బలమైన మౌత్ టాక్ ను సొంతం చేసుకుంది. తెలుగులో మైత్రి మూవీ మేకర్స్ విడుదల చేసిన ఈ చిత్రానికి ఇక్కడ కూడా అద్భుతమైన స్పందన లభించింది. ఏకంగా మూడు వారాలు దాటినా, ఇంకా థియేటర్లలో హౌస్‌ఫుల్ బోర్డులు కనిపిస్తున్నాయంటే ఈ సినిమా ఏ స్థాయిలో ప్రేక్షకులను ఆకట్టుకుందో అర్థం చేసుకోవచ్చు.
వార్ 2 (ఎన్టీఆర్-హృతిక్ రోషన్), కూలీ (రజినీకాంత్-నాగార్జున) వంటి భారీ బడ్జెట్, పాన్ ఇండియా చిత్రాలు బాక్సాఫీస్ వద్ద ఉన్నప్పటికీ, వాటికి ఏ మాత్రం తీసిపోకుండా సు ఫ్రమ్ సో సంచలన విజయం సాధించడం నిజంగా చెప్పుకోదగ్గ విషయం. పెద్ద సినిమాల మధ్యలో విడుదలై కూడా లాభాల బాట పట్టడం సినిమా వర్గాల్లో ఒక ఆసక్తికర చర్చకు దారితీసింది.
సు ఫ్రమ్ సో సినిమాకు జెపి తుమినాడ్ దర్శకత్వం వహించగా, ఆయనే కీలక పాత్ర పోషించారు. ఈ చిత్రంలో షనీల్ గౌతమ్, రాజ్ బి శెట్టి, ప్రకాష్ తుమినాడ్, సంధ్య అరకెరె వంటి నటులు కూడా నటించారు. కన్నడలో శశిధర్ శెట్టి బరోడా, రవి రాయ్ కైలాస, రాజ్.బి. శెట్టి ఈ చిత్రాన్ని నిర్మించారు. ఈ చిన్న సినిమా భారీ విజయం సాధించడంతో, నెటిజన్లు ఇది కదా అసలైన సక్సెస్ అంటే అంటూ కామెంట్లు పెడుతున్నారు. కథే అసలైన హీరో అని మరోసారి రుజువు చేసిన ఈ సినిమా, భవిష్యత్తులో చిన్న సినిమాలకు స్ఫూర్తిగా నిలిచే అవకాశం ఉంది.