Akhanda 2: అదరహో అనిపిస్తున్న అఖండ్ 2.. రికార్డు స్థాయిలో ఓటీటీ డీల్
Akhanda 2: నందమూరి బాలకృష్ణ, దర్శకుడు బోయపాటి శ్రీను కాంబినేషన్ అంటేనే బాక్సాఫీస్ షేక్ అవ్వడం ఖాయం. సింహ, లెజెండ్, అఖండ సినిమాలతో ఈ ఇద్దరూ హ్యాట్రిక్ హిట్స్ సాధించారు. ఇప్పుడు వీరి కాంబినేషన్‌లో వస్తున్న అఖండ సినిమాకు సీక్వెల్‌గా అఖండ-2 రూపొందుతోంది. ఇటీవల విడుదలైన ఫస్ట్ గ్లింప్స్ భారీ స్పందన తెచ్చుకుంది. ప్రస్తుతం ఈ సినిమాకు సంబంధించిన పోస్ట్ ప్రొడక్షన్, గ్రాఫిక్స్ పనులు శరవేగంగా జరుగుతున్నాయి.
ఈ సినిమాకు సంబంధించిన ఓటీటీ డీల్ ఇప్పుడు టాలీవుడ్ వర్గాల్లో పెద్ద హాట్ టాపిక్‌గా మారింది. ప్రముఖ ఓటీటీ సంస్థ నెట్‌ఫ్లిక్స్ అఖండ-2 డిజిటల్ స్ట్రీమింగ్ 0హక్కులను సొంతం చేసుకుంది. ఈ హక్కుల కోసం నెట్‌ఫ్లిక్స్ రూ. 80 కోట్ల భారీ మొత్తాన్ని చెల్లించినట్లు సినీ వర్గాల్లో చర్చ జరుగుతోంది.
సాధారణంగా ఈ స్థాయి ధర పాన్ ఇండియా మార్కెట్ ఉన్న నలుగురు తెలుగు స్టార్ హీరోల సినిమాలకు మాత్రమే లభిస్తుంది. ఇప్పుడు బాలకృష్ణ సినిమాకు కూడా అదే రేటు పలకడం ఒక రికార్డుగానే భావించాలి. అఖండ సృష్టించిన ప్రభంజనం, అలాగే బాలయ్య-బోయపాటి కాంబినేషన్‌కు ఉన్న క్రేజ్ కారణంగానే ఈ భారీ డీల్ కుదిరినట్లు తెలుస్తోంది. ఈ ఓటీటీ డీల్ నిర్మాతలు రామ్ అచంట, గోపీ అచంటలకు ఒక జాక్‌పాట్‌గా మారింది.
14 రీల్స్ ప్లస్ బ్యానర్‌పై రూపొందుతున్న ఈ సినిమాకు తమన్ సంగీతం అందిస్తున్నారు. ఈ ఏడాది డిసెంబర్ 5న అఖండ-2 సినిమాను విడుదల చేయడానికి సన్నాహాలు జరుగుతున్నాయి. ప్రస్తుతం ఈ సినిమా పోస్ట్ ప్రొడక్షన్ పనులు వేగంగా జరుగుతున్నాయి. ముఖ్యంగా వీఎఫ్‌ఎక్స్ వర్క్‌కు అధిక ప్రాధాన్యత ఇస్తున్నందున, నాణ్యత విషయంలో రాజీపడకూడదని మేకర్స్ భావిస్తున్నట్లు సమాచారం. ఈ సినిమాలో బాలయ్య సరసన సంయుక్తా మీనన్ కథానాయికగా నటిస్తుండగా, ఆది పినిశెట్టి ప్రతినాయకుడి పాత్రలో కనిపించనున్నారు.
మాస్, ఆధ్యాత్మికత, సామాజిక అంశాలు, మరియు యువతకు సందేశం వంటి అంశాలను మేళవిస్తూ బోయపాటి శ్రీను ఈ సినిమాను రూపొందిస్తున్నారు. తమన్ అందించిన శక్తివంతమైన సంగీతం, పవర్‌ఫుల్ డైలాగులు, భారీ యాక్షన్ సన్నివేశాలు అభిమానులకు పండుగలా అనిపిస్తాయని సినీ వర్గాల టాక్.