OG Movie: ‘ఓజీ’ కొత్త పాటతో గూస్ బంప్స్ – విలన్ ఇమ్రాన్ హష్మీ పాత్రకు స్పెషల్ సాంగ్
OG Movie: పవర్ స్టార్ పవన్ కల్యాణ్ కథానాయకుడిగా సుజీత్ దర్శకత్వంలో రూపొందుతున్న భారీ పాన్ ఇండియా చిత్రం ‘ఓజీ’. ఈ సినిమాపై అంచనాలు భారీగా ఉన్నాయి. డివివి దానయ్య, కల్యాణ్ దాసరి సంయుక్తంగా నిర్మిస్తున్న ఈ చిత్రంలో కథానాయికగా ప్రియాంక మోహన్ నటిస్తున్నారు. బాలీవుడ్ నటుడు ఇమ్రాన్ హష్మీ ఇందులో ప్రధాన విలన్ పాత్రలో కనిపించనున్నారు. తాజాగా, చిత్రబృందం ఇమ్రాన్ హష్మీ పోషించిన ‘ఓమి’ పాత్ర నేపథ్యంలో రూపొందించిన “ట్రాన్స్ ఆఫ్ ఓమి” అనే ప్రత్యేక గీతాన్ని విడుదల చేసింది.
ఈ పాట ప్రేక్షకులను విశేషంగా ఆకట్టుకుంటోంది. తమన్ సంగీతం అందించిన ఈ పాటకు అద్వితీయ సాహిత్యం ప్రాణం పోసింది. శ్రుతి రంజని, ప్రణతి, శ్రుతిక వంటి గాయకులు ఆలపించిన ఈ పాట థ్రిల్లింగ్ అనుభూతిని కలిగిస్తోంది. ‘ఓజీ’ చిత్రంలో పవన్ కల్యాణ్ పోషించిన ఓజాస్ గంభీర పాత్రకు, ఇమ్రాన్ హష్మీ పోషించిన ఓమి పాత్రకు మధ్య సాగే ముఖాముఖి పోరును ఈ పాట సూచిస్తున్నట్లుగా తెలుస్తోంది. రెండు శక్తివంతమైన పాత్రల మధ్య సంఘర్షణను ఈ గీతం అద్భుతంగా ఆవిష్కరించింది.
శక్తిమంతమైన గ్యాంగ్‌స్టర్ డ్రామాగా రూపొందిన ఈ చిత్రం ఈనెల 25న ప్రపంచవ్యాప్తంగా థియేటర్లలో విడుదల కానుంది. నవీన్ నూలి ఎడిటింగ్‌, రవి కె. చంద్రన్, మనోజ్ పరమహంస సినిమాటోగ్రఫీ ఈ సినిమాకు ప్రధాన ఆకర్షణగా నిలవనున్నాయి. ఈ పాట విడుదలైన క్షణం నుంచే సోషల్ మీడియాలో ట్రెండింగ్‌లో ఉంది. పవన్ కల్యాణ్ అభిమానులు, ఇమ్రాన్ హష్మీ ఫ్యాన్స్ ఈ పాటపై ప్రశంసలు కురిపిస్తున్నారు. మొత్తానికి, ‘ఓజీ’ సినిమాపై ఉన్న అంచనాలను ఈ పాట మరింత పెంచేసింది.
కాగా.. పవన్ కళ్యాణ్ స్టామినా ఏంటో అడ్వాన్స్ బుకింగ్‌ల ద్వారా మరోసారి రుజువయ్యింది. ముఖ్యంగా ఉత్తర అమెరికాలో ఈ సినిమా రికార్డు స్థాయి వసూళ్లను సాధిస్తోంది. రిలీజ్‌కు ఇంకా రెండు వారాల సమయం ఉన్నప్పటికీ, ఓవర్సీస్ డిస్ట్రిబ్యూటర్లు ఇప్పటికే అడ్వాన్స్ బుకింగ్‌ల ద్వారా $1.25 మిలియన్ డాలర్లు వసూలు చేసినట్లు అధికారికంగా ప్రకటించారు.