Kantara Chapter 1: ‘కాంతార: చాప్టర్ 1’ క్రేజ్.. ప్రపంచవ్యాప్తంగా 7,000 స్క్రీన్‌లలో విడుదల
Kantara Chapter 1: గతంలో దేశవ్యాప్తంగా సంచలనం సృష్టించిన ‘కాంతార’ సినిమాకు ప్రీక్వెల్‌గా వస్తున్న ‘కాంతార: చాప్టర్ 1’ చిత్రం విడుదల కోసం ప్రేక్షకులు ఆసక్తిగా ఎదురుచూస్తున్నారు. రిషబ్ శెట్టి దర్శకత్వంలో రూపొందిన ఈ చిత్రం, దసరా పండుగ సందర్భంగా అక్టోబరు 2న ప్రపంచవ్యాప్తంగా విడుదల కానుంది. తొలి సినిమా సాధించిన అద్భుతమైన విజయం నేపథ్యంలో, ఈ ప్రీక్వెల్‌ను కూడా ప్రపంచ ప్రేక్షకులకు చేరువ చేయాలని చిత్ర బృందం భారీ ప్రణాళికలు సిద్ధం చేసింది.
ఈ చిత్రాన్ని కన్నడ, తెలుగు, తమిళం, మలయాళం, హిందీ భాషలతో పాటు, అంతర్జాతీయ ప్రేక్షకులను దృష్టిలో ఉంచుకుని ఇంగ్లీష్, స్పానిష్ వెర్షన్లలో కూడా విడుదల చేయనున్నారు. ప్రపంచవ్యాప్తంగా ఏకంగా 7,000కు పైగా స్క్రీన్‌లలో ‘కాంతార: చాప్టర్ 1’ను విడుదల చేయాలని హోంబాలే ఫిల్మ్స్ నిర్ణయించింది. ప్రస్తుతం సినిమా పోస్ట్ ప్రొడక్షన్ పనులు చివరి దశకు చేరుకున్నాయి. సంగీత దర్శకుడు అజనీష్ లోక్‌నాథ్ ఇప్పటికే బ్యాక్‌గ్రౌండ్ స్కోర్‌కు మెరుగులు దిద్దుతున్నారు.
సినిమా విడుదల తేదీ దగ్గర పడుతుండటంతో, ప్రచార కార్యక్రమాలను కూడా చిత్ర బృందం ముమ్మరం చేసింది. సెప్టెంబరు 29 నుంచి ఉత్తర భారతదేశంలో ప్రెస్ టూర్ నిర్వహించనున్నారు. ఆ తర్వాత అక్టోబరు 27న కోచి, చెన్నై, హైదరాబాద్‌లలో చిత్ర యూనిట్ ప్రమోషనల్ ఈవెంట్లలో పాల్గొననుంది.
‘కాంతార’ సినిమా కన్నడ సంస్కృతిని, సంప్రదాయాలను ప్రపంచానికి పరిచయం చేసింది. ఇదే స్ఫూర్తితో ఇండియా పోస్ట్ కర్ణాటక పోస్టల్ సర్కిల్‌తో కలిసి ‘కాంతార’ థీమ్‌తో స్పెషల్ కవర్లను విడుదల చేసింది. భూతకోల కళను ప్రతిబింబించేలా ఈ పోస్టల్ కార్డులు రూపొందించారు. ఇది కన్నడ సంప్రదాయానికి దక్కిన అరుదైన గౌరవంగా చెప్పవచ్చు. ఈ పోస్టల్ కార్డులు కర్ణాటక సంస్కృతిని, జానపద కథలను రాబోయే తరాలకు తెలియజేస్తాయని ఇండియా పోస్ట్ పేర్కొంది. ‘కాంతార’ సినిమా విజయం ఈ తరహా సాంస్కృతిక ప్రచారానికి వేదికగా నిలవడం విశేషం.