Shambhala Trailer: ఆది సాయికుమార్ ‘శంబాల’ ట్రైలర్ విడుదల.. శివుడు-అసురుడి యుద్ధం
Shambhala Trailer: యంగ్ హీరో ఆది సాయికుమార్ నటించిన తాజా మిస్టికల్ హారర్ థ్రిల్లర్ ‘శంబాల.. ఏ మిస్టిక్ వరల్డ్’ సినిమా ట్రైలర్ తాజాగా విడుదలైంది. దర్శకుడు యుగంధర్ ముని ఈ చిత్రాన్ని ఒక సూపర్ నాచురల్ యాక్షన్ డ్రామాగా అత్యున్నత సాంకేతిక ప్రమాణాలతో తెరకెక్కించినట్లు ట్రైలర్ను చూస్తే అర్థమవుతోంది.
ట్రైలర్ ఆరంభంలోనే డబ్బింగ్ కింగ్గా పేరొందిన సాయికుమార్ వాయిస్ ఓవర్తో ఆసక్తిని పెంచారు. వేల సంవత్సరాల క్రితం పరమశివుడికి, ఒక భయంకరమైన అసురుడికి మధ్య జరిగిన భీకర యుద్ధం ఈ కథకు మూలమని ఆయన వాయిస్ ద్వారా తెలిపారు. ఆ తర్వాత, ఆకాశం నుంచి భూమిపైకి ఒక అతీంద్రియ శక్తి కలిగిన ఉల్క లాంటి రాయి పడుతుంది. ఈ ఘటన జరిగిన తర్వాత, ఆ ఊరి ప్రజలు వింతగా ప్రవర్తిస్తుంటారు, అనేక అనూహ్య సంఘటనలు చోటుచేసుకుంటాయి.
ఈ అతీంద్రయ రహస్యాన్ని ఛేదించడానికి రంగంలోకి దిగే పాత్రలో ఆది సాయికుమార్ కనిపించనున్నారు. ఆయన ఈ చిత్రంలో ఒక ఛాలెంజింగ్ జియో సైంటిస్ట్ (భౌగోళిక శాస్త్రవేత్త) పాత్రను పోషించారు. “సైన్స్కి సమాధానం దొరకనప్పుడు మూఢ నమ్మకం అంటుంది.. అదే సమాధానం దొరికితే అదే తన గొప్పదనం అంటుంది” వంటి శక్తివంతమైన డైలాగులు సినిమాలో ఉన్నట్లు తెలుస్తోంది. పంచభూతాలను శాసించే ఆ రక్కసి క్రీడను హీరో ఎలా ఆపాడు, ఆ ఊరి ప్రజలను ఎలా కాపాడాడు అనేదే ఈ సినిమా ప్రధాన కథాంశం.
అర్చన అయ్యర్, స్వాసిక ఈ చిత్రంలో హీరోయిన్లుగా నటించారు. రాజశేఖర్ అన్నభీమోజు, మహీధర్ రెడ్డి సంయుక్తంగా నిర్మిస్తున్న ఈ భారీ బడ్జెట్ చిత్రం, క్రిస్మస్ కానుకగా డిసెంబర్ 25న ప్రపంచవ్యాప్తంగా ప్రేక్షకుల ముందుకు రానుంది.