Ram Charan: రామ్ చరణ్ ‘పెద్ది’ ఫస్ట్ సింగిల్ హింట్.. ‘చికిరి చికిరి’ అంటూ ఏఆర్ రెహమాన్ ట్వీట్
Ram Charan: మెగా పవర్ స్టార్ రామ్ చరణ్, స్టార్ హీరోయిన్ జాన్వీ కపూర్ జంటగా నటిస్తున్న ప్రతిష్టాత్మక ప్రాజెక్ట్ ‘పెద్ది’ ప్రస్తుతం సినీ వర్గాల్లో హాట్ టాపిక్గా మారింది. ‘ఉప్పెన’తో తన ప్రతిభను నిరూపించుకున్న దర్శకుడు బుచ్చిబాబు సానా రూపొందిస్తున్న ఈ గ్రామీణ క్రీడా నేపథ్యంలో సాగే డ్రామాపై అంచనాలు భారీగా ఉన్నాయి. ఈ సినిమాకు సంబంధించిన తాజా అప్డేట్ సోషల్ మీడియాను షేక్ చేస్తోంది.
ఈ చిత్రానికి సంగీతం అందిస్తున్న ఆస్కార్ విజేత, సంగీత దిగ్గజం ఏఆర్ రెహమాన్ ఫస్ట్ సింగిల్ గురించి ఫ్యాన్స్కు ఓ ఆసక్తికరమైన సంకేతం ఇచ్చారు. రామ్ చరణ్ తన అధికారిక సోషల్ మీడియా ఖాతాలో, రెహమాన్, దర్శకుడు బుచ్చిబాబు, గాయకుడు మోహిత్ చౌహాన్తో కలిసి ఉన్న ఒక ఫోటోను షేర్ చేస్తూ, “ఏం ప్లాన్ చేస్తున్నారు?” అని ప్రశ్నించారు. దీనికి రెహమాన్ సరదాగా స్పందిస్తూ, “చికిరి చికిరి… చరణ్ గారూ!” అంటూ రిప్లై ఇచ్చారు.
ఈ ఇంటరాక్షన్ ఇప్పుడు నెట్టింట వేగంగా వ్యాపిస్తోంది. రెహమాన్ చేసిన ఈ వ్యాఖ్యలను బట్టి, ‘పెద్ది’ చిత్రం యొక్క తొలి పాట తుది మెరుగులు దిద్దుకుంటోందని, త్వరలోనే పాట విడుదల తేదీని ప్రకటించే అవకాశం ఉందని అభిమానులు గట్టిగా భావిస్తున్నారు. గ్లింప్స్లో ‘పెద్ది… పెద్ది…’ అంటూ రెహమాన్ ఇచ్చిన మ్యూజిక్ ఇప్పటికే అంచనాలను పెంచింది. ఇప్పుడు ఆయన పలికిన ‘చికిరి చికిరి’ పదం ఆ ఫస్ట్ సింగిల్లోని కీలకమైన లైన్గా ఉంటుందని ఫ్యాన్స్ ఊహిస్తున్నారు.
ఫ్యాన్స్ అంచనాల ప్రకారం, ఈ నెల 8వ తేదీన హైదరాబాద్లో జరగనున్న ఏఆర్ రెహమాన్ ప్రత్యేక సంగీత కార్యక్రమంలో ఈ పాటను విడుదల చేసే అవకాశం ఉంది. మరోవైపు, నిర్మాతలు ఇటీవల జాన్వీ కపూర్ పాత్రను రివీల్ చేశారు. ఆమె ఈ సినిమాలో ‘అచ్చియమ్మ’ అనే జానపద గాయని పాత్రలో, గ్రామీణ నేపథ్యంతో కూడిన మాస్ రోల్లో కనిపించనున్నారు. ఇప్పటివరకు జాన్వీ గ్లామరస్ పాత్రల్లోనే కనిపించగా, ఈ పాత్ర ఆమె కెరీర్కు కీలక మలుపుగా మారనుందని సినీ విశ్లేషకులు చెబుతున్నారు.
ఈ సినిమా షూటింగ్ శరవేగంగా జరుగుతోంది. ఇటీవల శ్రీలంకలో రామ్ చరణ్, జాన్వీ కపూర్ జంటపై ఓ రొమాంటిక్ పాటను చిత్రీకరించినట్లు సమాచారం. మైత్రీ మూవీ మేకర్స్, సుకుమార్ రైటింగ్స్ సమర్పణలో రూపొందుతున్న ఈ భారీ ప్రాజెక్టు 2026 మార్చి 27న విడుదల కానుంది.