Priyanka Mohan: సొంత గూటికి ‘ఓజీ’ బ్యూటీ.. శివన్న సరసన ప్రియాంక మోహన్ ఫిక్స్.. డైరెక్టర్ ఎవరంటే?
Priyanka Mohan: టాలీవుడ్, కోలీవుడ్లలో వరుస అవకాశాలతో దూసుకుపోతున్న అందాల తార ప్రియాంక అరుల్ మోహన్ తాజాగా ఒక ఆసక్తికరమైన నిర్ణయం తీసుకున్నారు. పవన్ కళ్యాణ్ సరసన ‘ఓజీ’ (OG), నానితో ‘సరిపోదా శనివారం’ వంటి క్రేజీ ప్రాజెక్టులతో తెలుగు ప్రేక్షకులకు దగ్గరైన ఈ భామ.. ఇప్పుడు తన సొంత ఇండస్ట్రీ అయిన శాండిల్వుడ్ (కన్నడ) వైపు మళ్లీ చూస్తున్నారు. చాలా కాలం తర్వాత కన్నడలో ఒక భారీ పీరియాడిక్ చిత్రానికి ఆమె గ్రీన్ సిగ్నల్ ఇవ్వడం ఇప్పుడు హాట్ టాపిక్గా మారింది.
కన్నడ చక్రవర్తి శివరాజ్కుమార్ హీరోగా తెరకెక్కుతున్న ప్రతిష్టాత్మక చిత్రం ‘666 ఆపరేషన్ డ్రీమ్ థియేటర్’. ఇటీవల ప్రియాంక మోహన్ పుట్టినరోజు సందర్భంగా చిత్ర బృందం ఆమెను ఈ ప్రాజెక్ట్లోకి స్వాగతిస్తూ అధికారిక ప్రకటన విడుదల చేసింది. ఇది కేవలం రెగ్యులర్ కమర్షియల్ సినిమా కాదు. ‘సప్త సాగరాలు దాటి’ వంటి ఎమోషనల్ హిట్ చిత్రంతో తెలుగు ప్రేక్షకులను కూడా మెప్పించిన సెన్సిబుల్ డైరెక్టర్ హేమంత్ ఎం. రావు ఈ చిత్రానికి దర్శకత్వం వహిస్తున్నారు. ఆయన దర్శకత్వంలో నటించడం అంటే నటనకు ఆస్కారం ఉన్న పాత్రే దక్కిందని అర్థం చేసుకోవచ్చు.
ఈ సినిమా 1970ల కాలం నాటి పీరియాడిక్ డ్రామాగా రూపొందుతోంది. ఆనాటి వాతావరణం, సెట్స్, ఎమోషన్స్తో ఈ చిత్రాన్ని అత్యంత భారీగా ప్లాన్ చేస్తున్నారు. ఇందులో మరో విశేషం ఏమిటంటే.. కన్నడ నాట విలక్షణ నటుడిగా పేరు తెచ్చుకున్న ‘డాలీ’ ధనంజయ కూడా ఇందులో ఒక కీలక పాత్ర పోషిస్తున్నారు. శివన్న, ధనంజయ, ఇప్పుడు ప్రియాంక.. ఇలా ఈ కాంబినేషన్ సినిమాపై అంచనాలను పెంచేసింది.
వాస్తవానికి ప్రియాంక మోహన్ కెరీర్ ప్రారంభమైందే కన్నడలో. 2019లో వచ్చిన హారర్ థ్రిల్లర్ ‘ఓంధ్ కథే హెల్లా’ ఆమె మొదటి సినిమా. ఆ తర్వాత తెలుగులో ‘గ్యాంగ్ లీడర్’తో ఇక్కడ బిజీ అయిపోయారు. ఇన్నాళ్లకు స్టార్ హీరోయిన్ హోదాలో తిరిగి కన్నడ గడ్డపై అడుగుపెడుతుండటంతో అక్కడి అభిమానులు ఫుల్ ఖుషీ అవుతున్నారు. ఈ పీరియాడిక్ డ్రామా ఆమె కెరీర్లో మైలురాయిగా నిలుస్తుందని సినీ విశ్లేషకులు భావిస్తున్నారు.