Ranveer Singh: ‘కాంతార’ వివాదంపై దిగొచ్చిన రణ్వీర్ సింగ్.. దైవాన్ని దెయ్యం అనడంపై క్షమాపణ
Ranveer Singh: బాలీవుడ్ స్టార్ నటుడు రణ్వీర్ సింగ్ (Ranveer Singh) తాజాగా ‘కాంతార’ (Kantara) చిత్రంపై చేసిన వ్యాఖ్యల కారణంగా తలెత్తిన వివాదంపై క్షమాపణలు తెలిపారు. గోవాలో జరిగిన ఇంటర్నేషనల్ ఫిల్మ్ ఫెస్టివల్ ఆఫ్ ఇండియా (IFFI) వేడుకల్లో నటుడు రిషబ్ శెట్టి (Rishab Shetty)తో కలిసి పాల్గొన్న రణ్వీర్, ‘కాంతార’ నటనను ప్రశంసించే క్రమంలో చేసిన వ్యాఖ్యలు కన్నడిగుల మనోభావాలను దెబ్బతీశాయి.
రణ్వీర్ సింగ్ రిషబ్ శెట్టిని ఉద్దేశించి మాట్లాడుతూ, ‘కాంతార’లో ఆయన నటన అద్భుతమని కొనియాడారు. ముఖ్యంగా హీరోలోకి దైవం ప్రవేశించే (పంజుర్లీ దేవత) సన్నివేశాలను ప్రస్తావిస్తూ, ఆ శక్తిని పొరపాటున ‘దెయ్యం’ (Demon/Ghost) అని సంబోధించారు. అంతేకాకుండా, ఇదే వేదికపై కాంతార చిత్రంలోని అత్యంత పవిత్రమైన “ఓం…” గర్జనను ఆయన హాస్యంగా అనుకరించి చూపించారు.
ఈ రెండు చర్యలు కన్నడ ప్రేక్షకులు, అభిమానుల ఆగ్రహానికి కారణమయ్యాయి. “పంజుర్లీ దైవం మా సంస్కృతిలో, ఆరాధనలో భాగం. దాన్ని దెయ్యం అని సంబోధించడం, ఆ గర్జనను జోక్గా తీసుకోవడం సరికాదు” అంటూ అనేక మంది కన్నడిగులు సోషల్ మీడియాలో రణ్వీర్పై విరుచుకుపడ్డారు. బహిరంగంగా క్షమాపణ చెప్పాలని డిమాండ్ చేస్తూ పెద్ద ఎత్తున పోస్టులు పెట్టారు.
ఈ వివాదం తీవ్ర రూపం దాల్చడంతో, రణ్వీర్ సింగ్ తాజాగా తన సోషల్ మీడియా వేదికగా స్పందిస్తూ క్షమాపణలు తెలియజేశారు. “రిషబ్ శెట్టి అద్భుతమైన ప్రదర్శనను హైలైట్ చేయడమే నా ఉద్దేశం. ఒక నటుడిగా, ఆ సన్నివేశాన్ని ఆయన ప్రదర్శించిన తీరుకు ఎంత కష్టపడతారో నాకు తెలుసు. అందుకే ఆయనపై నాకు ఎంతో గౌరవం ఉంది” అని పేర్కొన్నారు.
“మన దేశంలోని ప్రతి సంస్కృతి, సంప్రదాయం, నమ్మకాన్ని నేను ఎల్లప్పుడూ గౌరవిస్తాను. నా చర్యల వలన ఎవరి మనోభావాలైనా దెబ్బతిని ఉంటే, నేను దయచేసి, నిజాయితీగా క్షమాపణలు చెబుతున్నాను” అని రణ్వీర్ సింగ్ స్పష్టం చేశారు. ఈ విధంగా, రణ్వీర్ సింగ్ క్షమాపణతో ఈ వివాదం సద్దుమణుగుతుందని భావిస్తున్నారు.