Radhika Apte: గర్భవతి అని చెప్పినా ఆ నిర్మాత టార్చర్ చేయడం ఆపలేదు: రాధికా ఆప్టే
Radhika Apte: బాలీవుడ్, హాలీవుడ్, మరియు టాలీవుడ్లలో విలక్షణమైన పాత్రలతో తనకంటూ ఒక ప్రత్యేక గుర్తింపు తెచ్చుకున్న నటి రాధికా ఆప్టే తాజాగా చేసిన వ్యాఖ్యలు సినీ పరిశ్రమలో మరోసారి చర్చకు దారితీశాయి. తన మొదటి ప్రెగ్నెన్సీ సమయంలో ఒక సినిమా షూటింగ్లో తనకు ఎదురైన చేదు అనుభవాన్ని ఆమె పంచుకున్నారు. ఒక నిర్మాత తన ఆరోగ్యాన్ని పట్టించుకోకుండా, అమానవీయంగా ప్రవర్తించారని ఆమె ఆవేదన వ్యక్తం చేశారు.
ఆ నిర్మాత వేధించాడు..
ఒక ఇంటర్వ్యూలో రాధికా ఆప్టే మాట్లాడుతూ.. తాను ఒక సినిమా చిత్రీకరణలో ఉన్నప్పుడు గర్భవతిగా ఉన్నానని చెప్పారు. ఆ సమయంలో తనకు ఆరోగ్యం సరిగా లేకపోవడంతో డాక్టర్ను కలవాలనిపించిందని, అయితే ఆ సినిమా నిర్మాత మాత్రం వెళ్లడానికి అనుమతించలేదని తెలిపారు. ఎంతగా వేడుకున్నా, ఆ నిర్మాత కనికరం చూపించలేదని, పైగా గర్భవతి అయినప్పటికీ బిగుతైన దుస్తులు వేసుకోవాలని ఒత్తిడి చేశారని ఆమె వెల్లడించారు. సెట్లో ఉన్న అసౌకర్యం, తీవ్రమైన నొప్పిని భరిస్తూనే షూటింగ్లో పాల్గొనాల్సి వచ్చిందని ఆమె చెప్పారు.
ముఖ్యంగా వారికి వేధింపులు..
ఈ సంఘటనను వివరిస్తూ, “నా ఆరోగ్య పరిస్థితిని, గర్భవతిగా నా ఒత్తిడిని వారు ఏమాత్రం పట్టించుకోలేదు. డాక్టర్ను కలవడానికి అనుమతి ఇవ్వలేదు. నేను ఆకలితో ఉన్నానని చెప్పినా, సరైన ఆహారం కూడా అందించలేదు. ఆ సమయంలో వారు ప్రవర్తించిన తీరు చాలా బాధ కలిగించింది” అని రాధికా ఆప్టే అన్నారు. సినీ పరిశ్రమలో ఇలాంటి సంఘటనలు తరచుగా జరుగుతున్నాయని, కొత్తగా వచ్చే నటీమణులు ఇలాంటి వేధింపులకు గురవుతున్నారని ఆమె పరోక్షంగా సూచించారు.
అంతర్జాతీయ ప్రాజెక్టులతో బిజీబిజీగా..
రాధికా ఆప్టే తన వ్యక్తిగత జీవితాన్ని ఎల్లప్పుడూ గోప్యంగా ఉంచుతారు. 2013లో బ్రిటిష్ సంగీతకారుడు బెనెడిక్ట్ టేలర్ను వివాహం చేసుకున్న ఆమె, 2014లో ఒక ఆడబిడ్డకు జన్మనిచ్చారు. ప్రస్తుతం తన కుటుంబంతో సంతోషంగా ఉన్నారు. బాలకృష్ణతో కలిసి ‘లెజెండ్’, ‘లయన్’ వంటి తెలుగు చిత్రాల్లోనూ నటించిన ఆమె, ప్రస్తుతం పలు అంతర్జాతీయ ప్రాజెక్టులతో బిజీగా ఉన్నారు.