Akhanda 2: మహేష్ బాబు సినిమాల వల్లే ఆగిపోయిన అఖండ 2..! అసలేం జరిగిందంటే?
Akhanda 2: నటసింహం నందమూరి బాలకృష్ణ – మాస్ డైరెక్టర్ బోయపాటి శ్రీను కాంబినేషన్లో వస్తున్న పాన్-ఇండియా చిత్రం ‘అఖండ 2’ విడుదల చివరి నిమిషంలో ఆగిపోవడం సినీ పరిశ్రమతో పాటు అభిమానులను తీవ్ర నిరాశకు గురిచేసింది. టీజర్, ట్రైలర్లతో భారీ అంచనాలు నెలకొల్పిన ఈ సినిమా ప్రీమియర్ షోలు, టికెట్ బుకింగ్లు ఆకస్మికంగా రద్దు కావడంతో అభిమానులు సామాజిక మాధ్యమాల్లో తమ ఆగ్రహాన్ని, అసహనాన్ని వ్యక్తం చేశారు. “ఇంత పెద్ద ప్రాజెక్ట్కు చివరి నిమిషంలో ఇలాంటి ప్లానింగ్ లోపం ఏంటి?” అంటూ నిర్మాతల తీరుపై మండిపడ్డారు. మొదట్లో మేకర్స్ సాంకేతిక కారణాలను కారణంగా చూపినా, తెర వెనుక వేరే కారణాలు ఉన్నట్లు ఇప్పుడు స్పష్టమవుతోంది.
టాలీవుడ్ ఇండస్ట్రీ వర్గాల నుంచి అందుతున్న విశ్వసనీయ సమాచారం మేరకు ‘అఖండ 2’ విడుదల నిలిచిపోవడానికి ప్రధాన కారణం పాత ఆర్థిక వివాదాలే అని తెలుస్తోంది. ముఖ్యంగా, ’14 రీల్స్’ సంస్థ గతంలో పంపిణీ సంస్థ ఏరోస్ ఇంటర్నేషనల్ నుంచి తీసుకున్న ఫైనాన్స్, డిస్ట్రిబ్యూషన్ వ్యవహారాలకు సంబంధించిన బకాయిలే ఈ సమస్యకు మూలం.
మహేష్ బాబు నటించిన ‘1 నేనొక్కడినే’, ‘ఆగడు’ చిత్రాల పంపిణీ విషయంలో బాక్సాఫీస్ వద్ద భారీ నష్టాలు రావడంతో, 14 రీల్స్ సంస్థ ఏరోస్కు సుమారు ₹27 కోట్ల నుంచి ₹28 కోట్ల వరకు అసలు బకాయిపడినట్లు సమాచారం. కాలక్రమేణా వడ్డీలు కూడా భారీగా పెరగడంతో మొత్తం బాకీ మొత్తం మరింత పెరిగింది. ఈ బకాయిలు చెల్లించకుండానే 14 రీల్స్ సంస్థ ’14 Reels Plus’ పేరుతో కొత్త చిత్రాలు నిర్మిస్తోందనే ఆరోపణతో ఏరోస్ సంస్థ మద్రాస్ హైకోర్టును ఆశ్రయించింది.
ఈ లీగల్ కేసు విచారణ నేపథ్యంలో, మద్రాస్ హైకోర్టు ‘అఖండ 2′ చిత్రం విడుదలపై తాత్కాలిక స్టే విధించినట్లు తెలుస్తోంది. సాంకేతిక సమస్య కాకుండా, పాత ఆర్థిక సెటిల్మెంట్లు, న్యాయపరమైన వివాదాలే సినిమా రిలీజ్ను అడ్డుకున్నాయి. ఇటువంటి తీవ్రమైన ఆర్థిక వివాదంపై ’14 Reels Plus’ సంస్థ ఇప్పటివరకు ఎలాంటి అధికారిక ప్రకటన విడుదల చేయకపోవడం అభిమానుల్లో గందరగోళాన్ని మరింత పెంచుతోంది.
ప్రస్తుతం అందరి దృష్టి కోర్టు తీర్పుపైనే ఉంది. పెండింగ్ బకాయిల సెటిల్మెంట్ పూర్తయితేనే కోర్టు స్టే ఎత్తివేసే అవకాశం ఉంటుంది. ఆ తర్వాతే నిర్మాతలు కొత్త విడుదల తేదీని ప్రకటించగలరు. ఈ అనూహ్య పరిణామం బాలయ్య అభిమానులకు పెద్ద షాక్ ఇచ్చింది. సమస్యలు త్వరగా పరిష్కారమై, ఈ మాస్ యాక్షన్ ఎంటర్టైనర్ త్వరగా విడుదల కావాలని ఫ్యాన్స్ ఆకాంక్షిస్తున్నారు.