Allu Arjun: ‘ధురంధర్’పై ఐకాన్ స్టార్ ప్రశంసల వర్షం.. రణ్వీర్ సింగ్ నటనపై బన్నీ కామెంట్స్ వైరల్
Allu Arjun: బాలీవుడ్లో ప్రస్తుతం కలెక్షన్ల సునామీ సృష్టిస్తున్న యాక్షన్ థ్రిల్లర్ చిత్రం ‘ధురంధర్. రణ్వీర్ సింగ్, మాధవన్, అక్షయ్ ఖన్నా వంటి అగ్ర తారాగణం నటించిన ఈ సినిమాకు విమర్శకుల నుంచి, ప్రేక్షకుల నుంచి అద్భుతమైన స్పందన లభిస్తోంది. తాజాగా, ఈ సినిమాను వీక్షించిన ఐకాన్ స్టార్ అల్లు అర్జున్ ప్రశంసల వర్షం కురిపించారు.
సాధారణంగా సినిమాల గురించి ఎక్కువగా మాట్లాడని బన్నీ, ఈ చిత్ర విజయాన్ని చూసి సోషల్ మీడియా (ఎక్స్ వేదికగా) ద్వారా తన స్పందనను పంచుకున్నారు. ఆయన పోస్ట్ ప్రస్తుతం వైరల్ అవుతోంది.
“ఇప్పుడే ‘ధురంధర్’ సినిమా చూశాను. ఇది నిజంగా అత్యుత్తమ నటన, అద్భుతమైన సాంకేతిక విలువలు, మరియు అద్భుతమైన సౌండ్ట్రాక్ కలయికతో కూడిన అద్భుతమైన చిత్రం. నా సోదరుడు రణ్వీర్ సింగ్ తన నటనతో మరోసారి ప్రేక్షకులను అబ్బురపరిచాడు. ఈ సినిమా మొత్తానికే అతడి నటన హైలైట్గా నిలిచింది,” అని అల్లు అర్జున్ కొనియాడారు.
అలాగే ఇతర నటీనటుల గురించి మాట్లాడుతూ.. అక్షయ్ ఖన్నా పాత్ర చాలా శక్తివంతంగా ఉందని, సంజయ్ దత్, ఆర్. మాధవన్, అర్జున్ రాంపాల్ తమ పాత్రలలో జీవించారని ప్రశంసించారు. హీరోయిన్ సారా అర్జున్ నటన కూడా ఆకట్టుకుందని తెలిపారు.
ఈ భారీ విజయానికి ముఖ్య కారకుడు దర్శకుడు ఆదిత్య ధర్ అని బన్నీ ప్రత్యేకంగా పేర్కొన్నారు. “అన్నిటికంటే ముఖ్యంగా.. ఈ చిత్రానికి కెప్టెన్, అద్భుతమైన ఫిల్మ్ మేకర్ అయిన ఆదిత్య ధర్ గురించి చెప్పాలి. మీరు పూర్తి పట్టుదలతో ఒక గొప్ప దర్శకుడిగా ఈ సినిమాను విజయవంతంగా రూపొందించారు. నాకు సినిమా చాలా నచ్చింది! అందరూ తప్పకుండా ఈ సినిమా చూడండి,” అని అల్లు అర్జున్ పోస్ట్ చేశారు.
నిర్మాణ సంస్థలైన జ్యోతి దేశ్పాండే, జియో స్టూడియోస్కు మరియు సినిమా సాంకేతిక నిపుణులకు కూడా అల్లు అర్జున్ అభినందనలు తెలిపారు. అల్లు అర్జున్ లాంటి పాన్-ఇండియా స్టార్ నుంచి ప్రశంసలు దక్కడం ‘ధురంధర్’ టీమ్కు మరింత ఉత్సాహాన్ని ఇచ్చింది.