పూజ చేసాక దేవుడికి కొబ్బరికాయ కొట్టడం అనేది మన ఆచారం. పూజ పూర్తయ్యాక టెంకాయ కొట్టేస్తాము, నైవేద్యం పెట్టేసాము తంతు పూర్తి అయింది అని అనుకుంటాము. కానీ టెంకాయ కొట్టడంలో కూడా ఒక పద్దతి ఉంది. శాస్త్ర ప్రకారం కొబ్బరికాయ కొట్టడంలో కొన్ని నియమాలున్నాయి. కొందరికి కొబ్బరికాయ సరిగ్గా పగులుతుంది అంటే వారు శ్రద్ధగా కొట్టి ఉండవచ్చు. కొంతమంది మనసులో ఆందోళనలు, భయాలతో కొబ్బరికాయలు కొడతారు. అలాంటప్పుడు అది అడ్డదిడ్డంగా పగులుతుంది.
దీన్ని మంచి లేదా చెడుకు అన్వయించుకోవాల్సిన అవసరం లేదు. ఇక కొంతమంది కొబ్బరికాయ కొట్టినప్పుడు అది కుళ్ళిపోతుంది. దీన్ని చెడు గా భావిస్తారు. కొబ్బరికాయ కుళ్ళిపోతే కాళ్ళు, చేతులు కడుక్కుని పూజా మందిరాన్ని శుభ్రం చేసి మరొక కొబ్బరికాయ కొట్టడం మంచిది. అలాగే కొంతమంది వాహనాలకు పూజ చేసి కొబ్బరికాయ కొడుతుంటారు. ఇలాంటప్పుడు కొబ్బరికాయ కుళ్ళిపోతే మనసులో ఏ భయాలు పెట్టుకోకుండా వాహనాన్ని శుభ్రం చేసి మరొక కొబ్బరికాయ కొట్టాలి.
అలాగే కొబ్బరికాయ కొట్టినప్పుడు అందులో పువ్వు వస్తే మంచి జరుగుతుందని అర్థం. కొత్తగా పెళ్లయిన వారికి పువ్వు వస్తే వారికి సంతాన వృద్ధి కలుగుతుంది. ఇక కొబ్బరికాయ నిలువుగా పడవ ఆకారంలో పగిలితే ఆ ఇంట్లో ఉన్న కోడలు లేదా కూతురుకి గర్భధారణ జరగబోతుందని నమ్ముతారు. చెడు ఆలోచనలతో ఆందోళన, భయాలతో కొట్టడం వలన అవి నెరవేరవు. అందుకే దేవునిపై మనసు పెట్టి మంచిని మాత్రమే కోరుకోవాలి.