Coolie Movie: కూలీ సినిమాకు పెయిడ్ హాలిడే, ఫ్రీ టికెట్లు ఇచ్చిన కంపెనీ..!
Coolie Movie: సూపర్‌స్టార్ రజనీకాంత్‌కు ఉన్న ప్రపంచవ్యాప్త అభిమానం మరోసారి నిరూపితమైంది. కేవలం దేశంలోనే కాకుండా విదేశాల్లోనూ రజనీకాంత్ సినిమా విడుదల ఒక పండుగలా జరుగుతుంది. రజనీకాంత్ తాజా చిత్రం ‘కూలీ’ విడుదల సందర్భంగా సింగపూర్‌లోని ఒక నిర్మాణ సంస్థ తమ ఉద్యోగులకు పెయిడ్ హాలిడే ప్రకటించి, ఉచితంగా సినిమా టికెట్లు ఇచ్చి అందరినీ ఆశ్చర్యపరిచింది.
సాధారణంగా నచ్చిన హీరో సినిమా విడుదలైన రోజున చాలా మంది ఉద్యోగులు సెలవులు అడుగుతుంటారు. అయితే సింగపూర్‌లోని “ఫార్మర్ కన్‌స్ట్రక్షన్స్ పీటీఈ లిమిటెడ్” అనే సంస్థ తమ తమిళ ఉద్యోగుల కోసం ప్రత్యేకంగా ఈ బంపర్ ఆఫర్‌ను ప్రకటించింది. ఉద్యోగుల సంక్షేమం, ఒత్తిడి తగ్గించడం కోసం ఈ నిర్ణయం తీసుకున్నట్లు తెలిపింది. కేవలం సెలవు, టికెట్లు మాత్రమే కాకుండా, సినిమా చూస్తున్నప్పుడు ఆహారం, పానీయాల కోసం ఒక్కొక్కరికి అదనంగా 30 సింగపూర్ డాలర్లు కూడా ఇవ్వనున్నట్లు ఆ సంస్థ ప్రకటించింది. ఈ నిర్ణయంతో ఉద్యోగులు ఎలాంటి ఒత్తిడి లేకుండా సినిమాను ఆస్వాదించవచ్చని ఆ సంస్థ పేర్కొంది.
ఆగస్టు 14న విడుదల కానున్న ఈ సినిమా కోసం ఉద్యోగులు ఎంతో ఉత్సాహంగా ఎదురుచూస్తున్నారు. ఈ సంస్థ మాత్రమే కాకుండా, సింగపూర్‌లోని మరో సంస్థ ఎస్‌బీ మార్ట్ కూడా ‘కూలీ’ సినిమా కోసం తమ ఆఫీసుకు సగం రోజు సెలవు ప్రకటించింది. తమిళనాడులోని మధురైకి చెందిన యూనో ఆక్వా కేర్ అనే సంస్థ కూడా తన ఉద్యోగులకు ఉచిత టికెట్లు, సెలవు మంజూరు చేసింది. ఈ నిర్ణయం ఆ సంస్థకు చెందిన చెన్నై, బెంగళూరు, తిరుచ్చి, తిరునెల్వేలి వంటి అన్ని శాఖలకు వర్తిస్తుంది.
లోకేష్ కనగరాజ్ దర్శకత్వం వహించిన ఈ సినిమాలో రజనీకాంత్‌తో పాటు అక్కినేని నాగార్జున, సత్యరాజ్, అమీర్ ఖాన్, శ్రుతి హాసన్ వంటి ప్రముఖ నటులు కీలక పాత్రల్లో కనిపించనున్నారు. ఈ సినిమాపై ప్రేక్షకుల్లో భారీ అంచనాలు ఉన్నాయి. సెన్సార్ బోర్డు ఈ సినిమాకు ‘ఏ’ సర్టిఫికేట్ ఇవ్వడం వల్ల కుటుంబ ప్రేక్షకులకు కొంత నిరాశ కలిగించినప్పటికీ, ఈ చిత్రం వందకు పైగా దేశాల్లో విడుదల కానుంది. అదే రోజున హృతిక్ రోషన్, జూనియర్ ఎన్టీఆర్ నటించిన ‘వార్ 2’ కూడా విడుదల అవుతుండటంతో బాక్సాఫీస్ వద్ద రసవత్తర పోరు జరగనుంది.