Kaantha Movie: ‘లోక చాప్టర్ 1’ హిట్ కావడంతో.. ‘కాంత’ సినిమా విషయంలో వెనక్కి తగ్గిన దుల్కర్
Kaantha Movie: మలయాళ స్టార్ హీరో దుల్కర్ సల్మాన్ నిర్మించిన చిత్రం ‘కొత్త లోక’ ప్రస్తుతం బాక్సాఫీస్ వద్ద భారీ విజయాన్ని సొంతం చేసుకుంది. ఈ సినిమా అద్భుతమైన వసూళ్లతో దూసుకుపోతుండటంతో, దుల్కర్ సల్మాన్ తన తదుపరి చిత్రం ‘కాంత’ విడుదల తేదీని వాయిదా వేస్తున్నట్లు ప్రకటించారు. ఈ విషయాన్ని ఎక్స్ (గతంలో ట్విట్టర్) వేదికగా ‘కాంత’ చిత్ర బృందం ఒక ప్రకటన ద్వారా తెలియజేసింది.
“ప్రియమైన ప్రేక్షకులారా, మా సినిమా ‘కాంత’ టీజర్ విడుదలైనప్పటి నుంచి మీరు చూపిస్తున్న ప్రేమకు, మద్దతుకు మేము కృతజ్ఞులం. మీ అభిమానం మాకు ఎంతో విలువైనది. మా చిత్రం ద్వారా మీకు మరింత మెరుగైన అనుభూతిని అందించాలని మేము కోరుకుంటున్నాం. ‘కొత్త లోక’ ఘన విజయం సాధించి, బాక్సాఫీస్ వద్ద తన ప్రయాణాన్ని కొనసాగించాలని మేము మనస్ఫూర్తిగా కోరుకుంటున్నాం. ఈ నేపథ్యంలో మా సినిమా ‘కాంత’ విడుదల తేదీని వాయిదా వేస్తున్నామని మీకు తెలియజేస్తున్నాం. త్వరలో కొత్త విడుదల తేదీని ప్రకటిస్తాము. అప్పటివరకు మీ మద్దతు ఇలాగే కొనసాగుతుందని ఆశిస్తున్నాం” అంటూ ఆ ప్రకటనలో పేర్కొన్నారు.
వాస్తవానికి ఈ సినిమా సెప్టెంబర్ 12న విడుదల కావాల్సి ఉంది. అయితే, ‘కొత్త లోక’ కలెక్షన్‌లు ఇంకా వస్తుండటంతో, పోటీని నివారించడానికి ఈ నిర్ణయం తీసుకున్నట్లు తెలుస్తోంది. ప్రస్తుతం ఈ సినిమా దీపావళికి విడుదలయ్యే అవకాశం ఉందని పరిశ్రమలో ఊహాగానాలు వినిపిస్తున్నాయి.
‘కాంత’ చిత్రానికి సెల్వమణి సెల్వరాజ్ దర్శకత్వం వహించారు. ఈ సినిమాను దుల్కర్ సల్మాన్, రానా దగ్గుబాటి, ప్రశాంత్ పొట్లూరి, జోమ్ వర్గీస్ సంయుక్తంగా నిర్మిస్తున్నారు. ఈ చిత్రంలో భాగ్యశ్రీ బోర్సే, సముద్రకని కీలక పాత్రల్లో నటిస్తున్నారు. ఈ సినిమా టీజర్ ప్రేక్షకులను ఆకట్టుకోవడంతో, సినిమాపై అంచనాలు భారీగా ఉన్నాయి.