Krish HHVM: ‘హరి హర వీరమల్లు’పై క్రిష్ సంచలన వ్యాఖ్యలు.. పవన్ కళ్యాణ్‌తో గొడవలు లేవంటూనే..!
Krish HHVM: పవర్ స్టార్ పవన్ కళ్యాణ్ ప్రధాన పాత్రలో ప్రేక్షకుల ముందుకు వచ్చిన భారీ చిత్రం ‘హరి హర వీరమల్లు’ ప్రస్తుతం బాక్సాఫీస్ వద్ద మంచి వసూళ్లను రాబడుతూ విజయవంతంగా ప్రదర్శితమవుతోంది. అయితే, ఈ సినిమా నిర్మాణ సమయంలో చోటుచేసుకున్న పరిణామాలు, ముఖ్యంగా దర్శకత్వ మార్పుపై ఆసక్తికర చర్చ నడుస్తోంది. మొదట క్రిష్ జాగర్లమూడి దర్శకత్వంలో ప్రారంభమైన ఈ చిత్రాన్ని ఆ తర్వాత నిర్మాత ఏఎం రత్నం కుమారుడు జ్యోతికృష్ణ దర్శకత్వం వహించారు. ఈ అంశంపై దర్శకుడు క్రిష్ తాజాగా చేసిన వ్యాఖ్యలు ఇప్పుడు చర్చనీయాంశంగా మారాయి.
ఓ ప్రముఖ మీడియా సంస్థతో మాట్లాడిన క్రిష్, ‘హరి హర వీరమల్లు’ ప్రాజెక్ట్ నుంచి తాను తప్పుకోవడానికి గల అసలు కారణాలు త్వరలోనే బయటపడతాయని వెల్లడించినట్లు సమాచారం. ఈ ప్రకటన పవన్ అభిమానులతో పాటు సినీ వర్గాల్లోనూ తీవ్ర ఆసక్తిని రేకెత్తిస్తోంది. అయితే, పవన్ కళ్యాణ్‌తో తనకు ఎటువంటి విభేదాలు లేవని క్రిష్ స్పష్టం చేయడం విశేషం. “నాకు, పవన్ గారికి మధ్య ఎటువంటి క్రియేటివ్ డిఫరెన్సెస్ లేవు. నేను పూర్తిగా ఓపెన్‌గా ఉన్నాను. భవిష్యత్తులో పవన్ కళ్యాణ్‌తో కలిసి మరో సినిమా చేయడానికి నేను సిద్ధంగా ఉన్నాను” అని క్రిష్ వ్యాఖ్యానించినట్లు ఆ మీడియా సంస్థ పేర్కొంది.
కొద్దిరోజుల ముందు కూడా ప్రశంసల వర్షం..
‘హరి హర వీరమల్లు’ విడుదలైన కొద్ది రోజుల ముందు కూడా క్రిష్ తన సోషల్ మీడియా వేదికగా పవన్ కళ్యాణ్‌పై ప్రశంసల వర్షం కురిపించిన విషయం తెలిసిందే. ఈ సినిమా పూర్తి కావడానికి పవన్ కళ్యాణ్, నిర్మాత ఏఎం రత్నం గార్లే ప్రధాన కారణాలని ఆయన తన పోస్ట్‌లో పేర్కొన్నారు. ఇది పవన్-క్రిష్ మధ్య ఎటువంటి వ్యక్తిగత విభేదాలు లేవని మరోసారి స్పష్టం చేసింది.
ఓవర్సీస్‌లోనూ అద్భుతమైన వసూళ్లు..
జులై 24న ప్రపంచవ్యాప్తంగా విడుదలైన ‘హరి హర వీరమల్లు’ ఓవర్సీస్‌లోనూ అద్భుతమైన వసూళ్లను సాధిస్తోంది. తొలిరోజే వన్ మిలియన్ డాలర్ల క్లబ్‌లో చేరినట్లు నిర్మాణ సంస్థ అధికారికంగా ప్రకటించింది. పవన్ అభిమానులు మాత్రం భవిష్యత్తులో ఈ కాంబినేషన్‌లో మరో సినిమా చూడాలని ఆశిస్తున్నారు.