Canada Theatre: ఇండియన్ సినిమాలు నిలిపివేసిన కెనడా థియేటర్.. వరుస దాడులతో నిర్ణయం
Canada Theatre: కెనడాలో భారతీయ సినిమాల ప్రదర్శనకు ఆటంకం కలిగించే ఉదంతం చోటు చేసుకుంది. వరుసగా రెండుసార్లు దాడులు జరగడంతో కెనడాలోని ఓక్విల్లే ప్రాంతంలో ఉన్న ఫిల్మ్.కా (Film.Ca) థియేటర్ యాజమాన్యం సంచలన నిర్ణయం తీసుకుంది. తమ థియేటర్లో భారతీయ సినిమాల ప్రదర్శనను నిలిపివేస్తున్నట్లు ప్రకటించింది. భారతీయ సినిమాలు ప్రదర్శితమవుతున్న సమయంలోనే ఈ దాడులు జరుగుతున్నాయని పేర్కొంటూ, భద్రతా కారణాల దృష్ట్యా ఈ చర్య తీసుకున్నట్లు థియేటర్ యాజమాన్యం వెల్లడించింది.
వారం రోజుల్లో రెండు దాడులు
ఫిల్మ్.కా థియేటర్పై కేవలం వారం రోజుల వ్యవధిలోనే రెండు వేర్వేరు దాడులు జరిగాయి.
మొదటి దాడి: సెప్టెంబర్ 25న జరిగింది. ఇద్దరు అనుమానితులు హాలుకు నిప్పంటించేందుకు ప్రయత్నించారు. సిబ్బంది వెంటనే అప్రమత్తమై మంటలను ఆర్పివేయడంతో పెను ప్రమాదం తప్పింది. పెద్దగా నష్టం జరగకుండా ఊపిరి పీల్చుకున్నారు.
రెండో దాడి: తాజాగా అక్టోబర్ 2న తెల్లవారుజామున జరిగింది. ఒక అనుమానితుడు థియేటర్ ప్రవేశద్వారం వద్ద కాల్పులు జరిపాడు. ఈ వరుస దాడుల నేపథ్యంలో యాజమాన్యం తీవ్ర ఆందోళన వ్యక్తం చేసింది.
ఆగిపోయిన ‘కాంతార చాప్టర్ 1’, ‘ఓజీ’ ప్రదర్శన
ఈ థియేటర్లో ప్రదర్శనకు సిద్ధంగా ఉన్న భారతీయ చిత్రాలలో ‘ఓజీ’, ‘కాంతార చాప్టర్ 1’ వంటి ప్రముఖ చిత్రాలు కూడా ఉన్నాయి. దాడుల కారణంగా ఈ సినిమాల ప్రదర్శన కూడా ఆగిపోయింది.
ఈ దాడుల వెనుక ఖలిస్థానీ ఉగ్రవాదుల హస్తం ఉందనే అనుమానాన్ని థియేటర్ యాజమాన్యం వ్యక్తం చేస్తోంది. అయితే, పోలీసులు మాత్రం ఈ విషయాన్ని ఇంకా అధికారికంగా ధృవీకరించలేదు. ఇటీవల కెనడాలో ఖలిస్థానీ గ్రూపులు వాంకోవర్లోని భారత్ కాన్సులేట్ను సీజ్ చేస్తామంటూ బెదిరింపులకు పాల్పడిన నేపథ్యంలో, థియేటర్పై జరిగిన ఈ దాడులను కూడా వారే చేసి ఉండవచ్చని అనుమానిస్తున్నారు. కెనడాలో భారతీయ వ్యతిరేక కార్యకలాపాలు పెరుగుతున్న నేపథ్యంలో ఈ సంఘటన జరగడం కలకలం రేపుతోంది.