Homebound Trailer: విడుదలకు ముందే జాన్వీ కపూర్ సినిమాకు అవార్డులు.. ఎలా ఉందో తెలుసా?
Homebound Trailer: బాలీవుడ్‌లో సరికొత్త కథాంశంతో రూపొందిన చిత్రం ‘హోమ్‌బౌండ్’ నుంచి తాజాగా ట్రైలర్ విడుదలైంది. ఈ సినిమాకు ప్రపంచ ప్రఖ్యాత హాలీవుడ్ దర్శకుడు మార్టిన్ స్కోర్సెస్ ఎగ్జిక్యూటివ్ ప్రొడ్యూసర్‌గా వ్యవహరించడం విశేషం. ఇషాన్ ఖట్టర్, జాన్వీ కపూర్, విశాల్ జేత్వా ప్రధాన పాత్రల్లో నటించిన ఈ సినిమా, విడుదల కావడానికి ముందే పలు అంతర్జాతీయ అవార్డులను గెలుచుకుని అందరి దృష్టిని ఆకర్షించింది.
‘హోమ్‌బౌండ్’ కథ ఇద్దరు చిన్ననాటి స్నేహితులు – చందన్ కుమార్ (విశాల్ జేత్వా), మహ్మద్ షోయబ్ (ఇషాన్ ఖట్టర్) – జీవితాల చుట్టూ తిరుగుతుంది. గ్రామీణ నేపథ్యం నుంచి వచ్చిన ఈ యువకులు సమాజంలో గౌరవప్రదమైన జీవితం కోసం కలలు కంటారు. పేదరికం, సామాజిక వివక్షను అధిగమించి, దేశానికి సేవ చేయాలనే లక్ష్యంతో పోలీసు ఉద్యోగం కోసం ప్రయత్నిస్తారు. లక్షలాది మంది దరఖాస్తుదారుల నుంచి కేవలం కొన్ని వేల మందికి మాత్రమే అవకాశం ఉన్నప్పటికీ, యూనిఫాం ధరించి తమ కలలను సాకారం చేసుకోవాలనుకుంటారు. అయితే, చందన్ పరీక్షలో ఉత్తీర్ణుడైతే, మహ్మద్ విఫలమవుతాడు. చందన్ తన ఉద్యోగం కోసం ఎదురు చూస్తుండగా, మహ్మద్ ఒక ఎలక్ట్రానిక్స్ డీలర్ వద్ద పనిలో చేరి, తన హిందూ సహోద్యోగుల నుంచి గౌరవాన్ని పొందేందుకు ప్రయత్నిస్తాడు.
2020లో కోవిడ్-19 కారణంగా విధించిన లాక్‌డౌన్ సమయంలో, ఈ ఇద్దరు స్నేహితుల జీవితాలు విడిపోయి, మళ్లీ కలుసుకుంటాయి. ఈ ప్రయాణంలో వారి స్నేహం, ఆశలు, నిరాశలు, సామాజిక అసమానతలు, వ్యక్తిగత పోరాటాలను దర్శకుడు నీరజ్ ఘైవాన్ చాలా వాస్తవికంగా తెరకెక్కించారు. అట్టడుగు వర్గాల ప్రజలు గౌరవంగా బతకడానికి పడే కష్టాలను, వారి ఆశలను ఈ చిత్రం ఎంతో సున్నితంగా చిత్రీకరించింది. క‌ర‌ణ్ జోహార్ నిర్మించిన ఈ సినిమాలో జాన్వీ కపూర్ పోషించిన సుధా భారతి పాత్ర కూడా కథలో కీలకమైనది. ఈ ట్రైలర్ సినిమాపై భారీ అంచనాలను పెంచింది.