Kajol: పెళ్లికి ‘ఎక్స్‌పైరీ డేట్’ ఉండాలి.. కాజోల్ వ్యాఖ్యలపై సోషల్ మీడియాలో దుమారం
Kajol: బాలీవుడ్ అగ్ర నటి కాజోల్ ఇటీవల ఒక టాక్ షోలో వివాహ బంధం గురించి చేసిన వ్యాఖ్యలు తీవ్ర చర్చనీయాంశమయ్యాయి. ప్రముఖ ఓటీటీ ప్లాట్‌ఫామ్‌లో ట్వింకిల్ ఖన్నాతో కలిసి హోస్ట్‌గా వ్యవహరిస్తున్న ఒక చర్చా కార్యక్రమంలో కాజోల్ చేసిన వ్యాఖ్యలపై నెటిజన్లు తీవ్ర విమర్శలు గుప్పిస్తున్నారు.
రీసెంట్ ఎపిసోడ్‌కు నటులు విక్కీ కౌశల్, కృతి సనన్ అతిథులుగా హాజరయ్యారు. ఈ సందర్భంగా జరిగిన సంభాషణలో కాజోల్ మాట్లాడుతూ… “పెళ్లికి కూడా ఒక ఎక్స్‌పైరీ డేట్ ఉండాలి. అవసరమైతే రెన్యూవల్ చేసుకునే ఆప్షన్ కూడా ఉంటే బాగుంటుంది. నచ్చనివారితో బలవంతంగా ఆ బంధాన్ని కొనసాగించడం ఎందుకు?” అని వ్యాఖ్యానించారు. ట్వింకిల్ ఖన్నా కూడా ఈ అభిప్రాయానికి మద్దతు పలికారు. అయితే, అతిథులుగా ఉన్న విక్కీ కౌశల్, కృతి సనన్ మాత్రం ఈ ఆలోచనను తప్పుబట్టి, విరుద్ధమైన అభిప్రాయాన్ని వ్యక్తం చేశారు.
కాజోల్ వ్యాఖ్యలు సోషల్ మీడియాలో తీవ్ర దుమారాన్ని రేపాయి. నెటిజన్లు ఈ కామెంట్లపై తీవ్ర ఆగ్రహం వ్యక్తం చేస్తున్నారు. “వివాహ బంధాల విలువను తగ్గించే విధంగా, బాధ్యతారహితంగా మాట్లాడటం తగదు”, “పబ్లిక్ ఫిగర్స్‌గా ఇలాంటి నెగటివ్ కామెంట్లు సమాజంపై చెడు ప్రభావం చూపుతాయి” అంటూ కాజోల్, ట్వింకిల్ ఖన్నాలను తీవ్రంగా ట్రోల్ చేస్తున్నారు.
పెరుగుతున్న విమర్శల నేపథ్యంలో, ఇద్దరు హోస్టులు వెంటనే వివరణ ఇవ్వాల్సిన పరిస్థితి ఏర్పడింది. కాజోల్ స్పందిస్తూ… “మనం చెప్పిన దానిలో వివాదం సృష్టించే సెక్షన్ మాత్రమే హైలైట్ అయ్యింది. షోలో సరదాగా, హాస్యం కోసం మాట్లాడిన అంశాలను ఇంత సీరియస్‌గా తీసుకోవద్దు” అని పేర్కొన్నారు.
అలాగే ట్వింకిల్ ఖన్నా కూడా… “ఈ షోలో చెప్పే మాటలు పూర్తిగా హ్యూమర్ మాత్రమే. మేము మొదటి ఎపిసోడ్ నుంచే ఈ విషయంలో డిస్‌క్లైమర్ కూడా ఇస్తున్నాం” అని వివరణ ఇచ్చారు. అయినప్పటికీ, ఈ వివరణను నెటిజన్లు అంగీకరించడం లేదు. “ముందు ఇష్టానుసారంగా మాట్లాడి, తర్వాత అది సరదా అని తప్పించుకోవడం సరైన పద్ధతి కాదు” అని విమర్శిస్తూ, పబ్లిక్ ప్లాట్‌ఫామ్‌లో మాట్లాడేందుకు బాధ్యత ఉండాలని డిమాండ్ చేస్తున్నారు. మొత్తానికి, కాజోల్ ఈ వ్యాఖ్యల కారణంగా లేనిపోని చిక్కుల్లో పడ్డారని చెప్పవచ్చు.