Kajol: పెళ్లికి ఎక్స్పైరీ డేట్ ఉండాలి.. కాజోల్ కామెంట్స్పై సోషల్ మీడియాలో రచ్చ
Kajol: బాలీవుడ్ అగ్రతార కాజోల్ చేసిన తాజా వ్యాఖ్యలు ప్రస్తుతం సోషల్ మీడియాలో తీవ్ర చర్చకు దారితీశాయి. తన మనసులోని అభిప్రాయాలను నిర్మొహమాటంగా వెల్లడించే కాజోల్, ఈసారి మాత్రం వివాహం గురించి మరింత బోల్డ్గా మాట్లాడి అందరినీ ఆశ్చర్యానికి గురిచేశారు. “పెళ్లి బంధానికి కూడా గడువు తేదీ ఉండాలి. అంతేకాకుండా దానికి రెన్యువల్ చేసుకునే అవకాశం కూడా కల్పించాలి” అని ఆమె వ్యాఖ్యానించారు.
ముఖ్యంగా నటుడు అజయ్ దేవగణ్తో 26 ఏళ్లుగా సుదీర్ఘ, ఆనందకరమైన వైవాహిక జీవితాన్ని గడుపుతున్న కాజోల్ నుంచే ఈ తరహా కామెంట్స్ రావడంతో ఈ విషయం సినీ వర్గాల్లో హాట్ టాపిక్గా మారింది. ట్వింకిల్ ఖన్నాతో కలిసి కాజోల్ నిర్వహిస్తున్న సెలబ్రిటీ టాక్ షో ‘టూ మచ్ విత్ కాజోల్ అండ్ ట్వింకిల్’ తాజా ఎపిసోడ్కు నటులు విక్కీ కౌశల్, కృతి సనన్ అతిథులుగా హాజరయ్యారు. ఈ సందర్భంగా ట్వింకిల్ ఖన్నా ఒక ఆసక్తికరమైన ప్రశ్న సంధించారు “వివాహానికి గడువు తేదీ, ఆ తర్వాత రెన్యువల్ ఆప్షన్ ఉండాలా?”
ఈ ప్రశ్నకు విక్కీ కౌశల్, కృతి సనన్, ట్వింకిల్ ఖన్నా ముగ్గురూ ఏకగ్రీవంగా “వద్దు” అని జవాబిచ్చి రెడ్ జోన్ను ఎంచుకున్నారు. కానీ కాజోల్ మాత్రం ధైర్యంగా “అవును” అని చెప్పి గ్రీన్ జోన్లోకి వెళ్లి అక్కడ ఉన్న వారందరితో పాటు ప్రేక్షకులను కూడా షాక్కు గురిచేశారు. అప్పుడు ట్వింకిల్, “ఇది పెళ్లి, వాషింగ్ మెషీన్ కాదు కదా!” అంటూ చమత్కరించారు.
దీనిపై స్పందించిన కాజోల్ తన ఆలోచన వెనుక ఉన్న కారణాన్ని వివరించారు. “సరైన సమయానికి, సరైన వ్యక్తినే పెళ్లి చేసుకుంటామని ఎవరూ హామీ ఇవ్వలేరు. ఒకవేళ వివాహానికి గడువు ఉంటే, ఇష్టం లేని బంధంలో ఎక్కువ కాలం బాధపడాల్సిన అవసరం ఉండదు. రెన్యువల్ ఆప్షన్ ఉంటే, ఆ బంధానికి కొత్త ఉద్దేశం, కొత్త అర్థం వస్తుంది” అని ఆమె పేర్కొన్నారు.
కాజోల్ చేసిన ఈ బోల్డ్ కామెంట్లు ప్రస్తుతం నెట్టింట వైరల్ అవుతున్నాయి. కొందరు నెటిజన్లు ఆమె అభిప్రాయాన్ని “ఆధునిక ఆలోచన”గా కొనియాడుతూ మద్దతు తెలుపుతుంటే, మరికొందరు మాత్రం “భారతీయ సంస్కృతికి విరుద్ధం” అని విమర్శిస్తున్నారు. ఈ చర్చల మధ్య కాజోల్ మరో ప్రశ్నపై మాట్లాడుతూ, “డబ్బు ఎక్కువగా ఉంటే కొన్నిసార్లు నిజమైన సంతోషాన్ని అర్థం చేసుకునే అవకాశం కోల్పోతాం” అని వ్యాఖ్యానించారు. మొత్తానికి, కాజోల్ నిస్సందేహమైన అభిప్రాయాలు బాలీవుడ్ వర్గాల్లో పెద్ద చర్చకు తెరలేపాయి.