Kantara Chapter 1: ‘కాంతార చాప్టర్ 1’.. కేవలం 9 రోజుల్లోనే రూ. 500 కోట్ల క్లబ్‌లో చేరిన రిషబ్ శెట్టి చిత్రం
Kantara Chapter 1: కన్నడ సినీ పరిశ్రమ ఖ్యాతిని ప్రపంచవ్యాప్తం చేసిన నటుడు, దర్శకుడు రిషబ్ శెట్టి తెరకెక్కించిన తాజా అద్భుతం ‘కాంతార: చాప్టర్ 1’. మెగా బ్లాక్‌బస్టర్ ‘కాంతార’కు ప్రీక్వెల్‌గా రూపొందిన ఈ చిత్రం, దసరా పండుగ కానుకగా విడుదలైనప్పటి నుంచి బాక్సాఫీస్ వద్ద సునామీ సృష్టిస్తోంది. ఈ పౌరాణిక యాక్షన్ డ్రామా కేవలం తొమ్మిది రోజుల్లోనే రూ. 500 కోట్ల క్లబ్‌లో చేరి, మరో అరుదైన రికార్డును తన ఖాతాలో వేసుకుంది.
తాజాగా, చిత్ర నిర్మాణ సంస్థ ఈ అద్భుత ఘనతను అధికారికంగా ప్రకటించింది. విడుదలైన 9 రోజుల్లోనే ప్రపంచవ్యాప్తంగా రూ. 509 కోట్ల గ్రాస్ వసూళ్లను సాధించినట్లు తెలుపుతూ ఒక ప్రత్యేక పోస్టర్‌ను విడుదల చేసింది. దేశీయంగానే కాకుండా, అంతర్జాతీయ మార్కెట్లలోనూ ఈ చిత్రానికి వస్తున్న విశేష స్పందనతో వసూళ్ల ప్రభంజనం కొనసాగుతోంది. రిషబ్ శెట్టి దర్శకత్వం, నటన, ఉన్నతమైన సాంకేతిక విలువలు, అలాగే సినిమాలోని ఆత్మ ఈ స్థాయిలో విజయాన్ని అందించాయి.
ప్రధానంగా, ఈ వారం వీకెండ్‌లో థియేటర్లలో పెద్ద సినిమాలు ఏవీ విడుదల కాకపోవడం ‘కాంతార: చాప్టర్ 1’ చిత్రానికి మరింత కలిసొచ్చే అంశంగా మారింది. ఈ బలమైన రన్ కొనసాగితే, ఈ కన్నడ చిత్రం రాబోయే రోజుల్లో మరిన్ని రికార్డులు సృష్టించడం ఖాయమని సినీ విశ్లేషకులు అంచనా వేస్తున్నారు.
‘కాంతార’ చిత్రం ఇచ్చిన అంచనాలను ‘చాప్టర్ 1’ రెట్టింపు చేసిందని సినీ విమర్శకులు సైతం ప్రశంసిస్తున్నారు. ముఖ్యంగా పండుగ సీజన్‌లో విడుదల కావడం, కంటెంట్‌ పరంగా సినిమా ప్రేక్షకులను పూర్తిగా మెప్పించడంతో.. థియేటర్లలో వంద శాతం ఆక్యుపెన్సీ నమోదవుతోంది. తెలుగు రాష్ట్రాలతో పాటు, హిందీ, తమిళ, మలయాళ భాషల్లోనూ ఈ చిత్రం భారీగా వసూళ్లను రాబడుతోంది. రిషబ్ శెట్టి ఈ సినిమాలో శివ పాత్రకు ముందున్న కథను తన అద్భుతమైన నటనతో పతాక స్థాయికి తీసుకెళ్లారు. ఈ అసాధారణమైన బాక్సాఫీస్ ప్రదర్శనతో కన్నడ చిత్ర పరిశ్రమ మరోసారి దేశవ్యాప్తంగా తన ప్రభావాన్ని చాటుకుంటోంది.