Kantara Chapter 1: కాంతార చాప్టర్ 1 మరో రికార్డు.. రిషబ్ శెట్టి చిత్రానికి విశేష ఆదరణ
Kantara Chapter 1: దర్శకుడు, నటుడు రిషబ్ శెట్టి విజన్ నుంచి వెలువడిన బ్లాక్‌బస్టర్ చిత్రం ‘కాంతార చాప్టర్ 1’ బాక్సాఫీస్ వద్ద రికార్డుల వేటను ఇంకా కొనసాగిస్తోంది. ఈ చిత్రం విడుదలై చాలా కాలమైనా, సౌత్‌ నుంచి నార్త్‌ వరకు, సరిహద్దులు దాటి విదేశాల్లోనూ తన మాయాజాలాన్ని ప్రదర్శిస్తూ ట్రేడ్ వర్గాలను ఆశ్చర్యపరుస్తోంది. ప్రపంచవ్యాప్తంగా ఇప్పటికే రూ.700 కోట్లకు పైగా వసూళ్లు సాధించి, రూ.1000 కోట్ల క్లబ్ దిశగా దూసుకుపోతున్న ఈ చిత్రం, తాజాగా మరో అరుదైన మైలురాయిని చేరుకుంది.
ఈ సినిమా నిర్మాణ సంస్థ ప్రకటించిన వివరాల ప్రకారం, ‘కాంతార చాప్టర్ 1’ ఈ ఏడాది ఆస్ట్రేలియాలో అత్యధిక వసూళ్లు సాధించిన భారతీయ చిత్రంగా రికార్డు సృష్టించింది. ఇది తమకు దక్కిన అరుదైన గౌరవంగా చిత్ర బృందం సోషల్ మీడియా వేదికగా అభిమానులకు కృతజ్ఞతలు తెలియజేసింది.
దేశీయంగానూ ఈ చిత్రం సంచలనం సృష్టిస్తూనే ఉంది. కేరళ బాక్సాఫీస్ వద్ద కూడా రూ.55 కోట్లకు పైగా గ్రాస్ వసూళ్లతో తిరుగులేని విజయాన్ని నమోదు చేసింది. మలయాళ చిత్ర పరిశ్రమకు చెందిన దిగ్గజ సినిమాలకు గట్టి పోటీనిస్తూ, అద్భుతమైన కలెక్షన్లను సాధించడం ఈ సినిమా పాన్ ఇండియా సత్తాను చాటుతోంది.
రిషబ్ శెట్టి స్వీయ దర్శకత్వంలో, అద్భుతమైన సాంకేతిక హంగులతో కూడిన ఈ ప్రీక్వెల్ చిత్రం అక్టోబర్‌ 2న ప్రేక్షకుల ముందుకు వచ్చింది. ఇతిహాస గాథ, ఆసక్తికరమైన కథాంశంతో కూడిన ఈ చిత్రం, రిషబ్ శెట్టికి దర్శకుడిగా, నటుడిగా దేశవ్యాప్తంగా తిరుగులేని ఫేమ్‌ను తెచ్చిపెట్టింది. పండుగ సీజన్ ముగిసినా, ఇప్పటికీ థియేటర్లలో విజయవంతంగా ప్రదర్శితమవుతూ, వసూళ్లను సాధిస్తున్న ఈ సినిమాపై ప్రేక్షకుల్లో, ట్రేడ్ వర్గాల్లో అంచనాలు మరింత పెరిగాయి.