Kantara Chapter 1: ‘కాంతార ఛాప్టర్ 1’లో ‘భూత కోల’పై వివాదం.. తిరుపతిలో దానిపై నిషేధం

Kantara Chapter 1: ‘కాంతార ఛాప్టర్ 1’లో ‘భూత కోల’పై వివాదం.. తిరుపతిలో దానిపై నిషేధం

Kantara Chapter 1: దర్శక-నటుడు రిషబ్ శెట్టి సృష్టించిన బ్లాక్‌బస్టర్ చిత్రం ‘కాంతార’ దేశవ్యాప్తంగా కలెక్షన్ల సునామీ సృష్టించింది. రూ.400 కోట్లకు పైగా వసూళ్లు సాధించిన ఈ సినిమాకు ప్రీక్వెల్‌గా వచ్చిన ‘కాంతార ఛాప్టర్ 1’ కూడా భారీ అంచనాలను అందుకుంటూ దూసుకుపోతోంది. ఈ సినిమాల విజయం ఎంత గొప్పదో, వాటిలో చూపించిన భూతకోల ప్రదర్శన చుట్టూ అలుముకున్న వివాదాలు, చర్చలు కూడా అంతే ఉధృతంగా కొనసాగుతున్నాయి.

ముఖ్యంగా, ‘కాంతార’ చిత్రంలో రిషబ్ శెట్టి ప్రదర్శించిన ‘వరాహా రూపం’ నృత్యానికి అపూర్వ స్పందన లభించింది. ఈ ప్రదర్శనకు ఆయనకు జాతీయ అవార్డు సైతం దక్కింది. అయితే, కొంతమంది దీనిని కేవలం శక్తివంతమైన కళా రూపంగా చూస్తుంటే, మరికొందరు దీనిని దైవారాధన ప్రక్రియగా, తమ సంప్రదాయ నమ్మకంలో భాగంగా గౌరవిస్తున్నారు.

నిజానికి, భూతకోల అనేది కేవలం ఒక నృత్యం మాత్రమే కాదు. ఇది ముఖ్యంగా కర్ణాటకలోని తులూ భాష మాట్లాడే ప్రజల నమ్మకాల్లో భాగమైన ఒక సంప్రదాయ ఆరాధనా విధానం. భూత అంటే ‘పంచభూతాలు’ అని అర్థం. ఈ ఆరాధనలో పంజుర్లి (పంది రూపు), గుళిగ (ప్రకృతి శక్తులు), కొరగజ్జ (చారిత్రక వీరులు) వంటి అనేక స్థానిక దేవతలను పూజిస్తారు. ఇది కూచిపూడి, భరతనాట్యం వంటి శాస్త్రీయ నృత్యాలకు భిన్నంగా ఉంటుంది.

సమస్య ఎక్కడ మొదలైందంటే, ఈ సంప్రదాయాన్ని స్థానిక ప్రాంతం దాటి, ఇతర వేదికలపై ప్రదర్శించడంపై కొందరు అభ్యంతరం వ్యక్తం చేస్తున్నారు. ఇటీవల తిరుమల తిరుపతి దేవస్థానంలో భూతకోల ప్రదర్శన ఏర్పాటు చేసినప్పుడు కూడా పలు వర్గాలు అభ్యంతరం తెలిపాయి. ఇది కేవలం దైవారాధన కాదని, ‘ఆత్మలను ఆరాధించే తాంత్రిక ప్రక్రియ’ అని కొందరు వాదించడం ప్రజల్లో మరింత గందరగోళాన్ని సృష్టించింది.

‘కాంతార’ సినిమా చూసిన చాలామంది, ‘వరాహా రూపం’ ను విష్ణుమూర్తి వరాహ అవతారంగా పొరబడ్డారు. కానీ, కథనం ప్రకారం ఇది పంజుర్లి అనే స్థానిక గ్రామ దేవత రూపం. ఈ దైవానికి సంబంధించిన పౌరాణిక కథ, పంటలను రక్షించే అడవి పందుల నుంచి వచ్చింది. ప్రాంతీయ సంప్రదాయాల ప్రత్యేకతను, వాటి పూజా విధానాలను పూర్తిగా అర్థం చేసుకోకుండా, అన్ని నృత్యాలు లేదా ఆరాధనలు ఒకటేనన్న అపోహ కలగడం వల్లే ఈ వివాదాలు చెలరేగుతున్నాయని నిపుణులు అభిప్రాయపడుతున్నారు.