Annagaru Vastaru: డైలాగ్ లేదు.. అయినా గూస్‌బంప్స్! కార్తీ ‘అన్నగారు వస్తారు’ టీజర్ సంచలనం
Annagaru Vastaru: తమిళ సినీ పరిశ్రమలో తనకంటూ ప్రత్యేక స్థానాన్ని సంపాదించుకున్న కథానాయకుడు కార్తీ, త్వరలో ‘అన్నగారు వస్తారు’ (తమిళంలో ‘వా వాతియార్’) చిత్రంతో ప్రేక్షకుల ముందుకు రాబోతున్నారు. ఈ యాక్షన్ ఎంటర్‌టైనర్ కోసం అభిమానుల్లో భారీ అంచనాలు నెలకొన్నాయి. తాజాగా విడుదలైన టీజర్ ఆ అంచనాలను మరింత పెంచింది.
టాలీవుడ్ ప్రముఖ దర్శకుడు అనిల్ రావిపూడి చేతుల మీదుగా శుక్రవారం విడుదలైన ఈ టీజర్, పూర్తిస్థాయి పోలీస్ డ్రామాగా సినిమా రూపుదిద్దుకుంటున్నట్లు స్పష్టం చేసింది. ఈ చిత్రంలో కార్తీ పవర్‌ఫుల్ పోలీస్ ఆఫీసర్‌గా కనిపించనున్నారు. ఇటీవల విడుదల చేసిన స్పెషల్ పోస్టర్‌లో కార్తీ స్టైలిష్ లుక్ ఇప్పటికే వైరల్ అవ్వగా, టీజర్‌తో హైప్ తారాస్థాయికి చేరింది.
ఈ టీజర్‌లోని ప్రత్యేకత ఏమిటంటే, ఇందులో ఒక్క డైలాగ్ కూడా లేదు. కేవలం అద్భుతమైన విజువల్స్, సంతోష్ నారాయణన్ అందించిన గూస్‌బంప్స్ తెప్పించే బ్యాక్‌గ్రౌండ్ స్కోర్ మాత్రమే ఉన్నాయి. టీజర్ ప్రారంభంలోనే కార్తీ ఎంట్రీని, పోలీస్ ఆఫీసర్‌గా ఆయనకు దక్కిన గ్రాండ్ వెల్‌కమ్‌ను, ప్యూర్ ఎలివేషన్ షాట్స్‌ను చూపించారు. ఈ ప్రెజెంటేషన్ మాస్ ప్రేక్షకులను ఎంతగానో ఆకట్టుకుంది.
అయితే టీజర్ కార్తీ పాత్ర చుట్టూ ఒక మిస్టరీని అల్లుతూ, ‘ఈ పోలీస్ ఆఫీసర్ రోల్ ఏమై ఉంటుంది?’ అనే ఉత్కంఠను ప్రేక్షకుల్లో రేపింది. ఈ డిఫరెంట్ ట్రీట్‌మెంట్ చూసిన అభిమానులు, “సినిమా కథ అద్భుతంగా ఉంటుంది” అంటూ సోషల్ మీడియాలో కామెంట్లు పెడుతున్నారు. ఈ చిత్రంలో యువ నటి కృతిశెట్టి కథానాయికగా నటిస్తున్నారు. టీజర్‌లో ఆమె లుక్ రివీల్ చేయనప్పటికీ, ఆమె పాత్ర సినిమాకి కీలకమైన ఆకర్షణగా నిలవనుందని సమాచారం. నలన్ కుమారస్వామి దర్శకత్వం వహిస్తున్న ఈ చిత్రంలో సత్యరాజ్, మధుర్ మిట్టల్, ఆనంద్ రాజ్, రాజ్ కిరణ్, శిల్పా మంజునాథ్, కరుణాకరణ్ వంటి ప్రముఖ నటులు ముఖ్య పాత్రలు పోషిస్తున్నారు.
స్టూడియో గ్రీన్ పతాకంపై కేఈ జ్ఞానవేల్ రాజా ఈ సినిమాను భారీ స్థాయిలో నిర్మిస్తున్నారు. టీజర్‌లో ప్రొడక్షన్ విలువలు, క్వాలిటీ స్పష్టంగా కనిపించాయి. తమిళ వెర్షన్ డిసెంబర్ 5న విడుదల కానుండగా, తెలుగులో ‘అన్నగారు వస్తారు’ అదే రోజున విడుదలవుతుందా లేదా అనే దానిపై అధికారిక ప్రకటన రావాల్సి ఉంది. ఈ స్టైలిష్ మాస్ ఎంటర్‌టైనర్ కోసం ప్రేక్షకులు ఆసక్తిగా ఎదురుచూస్తున్నారు.