iBomma: పైరసీ వెబ్సైట్ ‘ఐబొమ్మ’ కీలక నిర్వాహకుడు అరెస్ట్.. రూ. 3 కోట్లు ఫ్రీజ్
iBomma: తెలుగు సినిమా పరిశ్రమకు సవాల్ విసురుతూ, ఉచితంగా సినిమాలను ఆన్‌లైన్‌లో అక్రమంగా అందిస్తున్న ప్రముఖ పైరసీ వెబ్సైట్ ఐబొమ్మ (i-Bomma)కు సైబర్ క్రైమ్ పోలీసులు గట్టి ఎదురుదెబ్బ ఇచ్చారు. ఈ వెబ్సైట్ నిర్వహణలో కీలక పాత్ర పోషించిన ఇమ్మడి రవి అనే వ్యక్తిని హైదరాబాద్ సైబర్ క్రైమ్ పోలీసులు అరెస్ట్ చేశారు.
పోలీసులు తెలిపిన వివరాల ప్రకారం విదేశాల నుంచి నగరానికి చేరుకున్న ఇమ్మడి రవిని కూకట్‌పల్లి ప్రాంతంలో అదుపులోకి తీసుకున్నారు. రవి గత కొంతకాలంగా ఫ్రాన్స్ నుంచి కరేబియన్ దీవులలో ఉంటూ ఈ భారీ పైరసీ కార్యకలాపాలను నిర్వహిస్తున్నట్లు పోలీసులు గుర్తించారు.
ఐబొమ్మ వెబ్‌సైట్‌పై గతంలోనే తెలుగు ఫిల్మ్ యాంటీ పైరసీ టీమ్ హైదరాబాద్ పోలీసులకు అధికారికంగా ఫిర్యాదు చేసింది. పైరసీని అరికట్టేందుకు పరిశ్రమ వర్గాలు ఎన్ని ప్రయత్నాలు చేసినా, ఐబొమ్మ నిర్వాహకులు ఏకంగా పోలీసులకు సవాలు విసురుతూ ప్రకటనలు చేయడం అప్పట్లో సంచలనం సృష్టించింది. ఈ సవాలును సీరియస్‌గా తీసుకున్న సైబర్ క్రైమ్ పోలీసులు తమ దర్యాప్తును మరింత ముమ్మరం చేశారు. అత్యాధునిక సాంకేతిక పరిజ్ఞానాన్ని ఉపయోగించి, సుదీర్ఘ దర్యాప్తు అనంతరం కీలక నిర్వాహకుడిని అరెస్ట్ చేయగలిగారు.
రవి అరెస్ట్ అనంతరం అతని బ్యాంక్ అకౌంట్లలో ఉన్న దాదాపు రూ. 3 కోట్లను పోలీసులు తక్షణమే ఫ్రీజ్ చేశారు. పైరసీ కార్యకలాపాల ద్వారా సంపాదించిన ఈ అక్రమ ధనాన్ని నిందితుడిపై కేసు విచారణ పూర్తయ్యే వరకు ఉపయోగించకుండా అడ్డుకట్ట వేశారు. గతంలో ఐబొమ్మ వెబ్సైట్ కోసం ఏజెంట్లుగా పనిచేస్తున్న పలువురు నిందితులను సైతం పోలీసులు బిహార్, ఉత్తరప్రదేశ్‌తో పాటు దేశంలోని పలు రాష్ట్రాల్లో అరెస్ట్ చేసిన సంగతి తెలిసిందే. తాజా అరెస్ట్‌తో ఐబొమ్మ పైరసీ వెబ్సైట్ మూలాలపై పోలీసులు మరింత దృష్టి సారించే అవకాశం ఉంది. ఈ వెబ్‌సైట్‌కు ఆర్థికంగా, సాంకేతికంగా మద్దతు ఇస్తున్న పూర్తి నెట్‌వర్క్‌ను ఛేదించే దిశగా దర్యాప్తు వేగవంతం కానుంది. ఈ అరెస్ట్‌తో పైరసీకి వ్యతిరేకంగా పోరాడుతున్న సినీ పరిశ్రమకు గొప్ప ఊరట లభించినట్లైంది.