Nagarjuna Fitness: 65 ఏళ్ల వయసులోనూ కుర్రాడిలా నాగార్జున.. ఇదే సీక్రెట్
Nagarjuna Fitness: ‘కింగ్’ నాగార్జున తెలుగు చిత్ర పరిశ్రమలో సుదీర్ఘ కాలంగా అగ్ర కథానాయకుడిగా కొనసాగుతున్నారు. సుమారు 65 ఏళ్ల వయసులో కూడా ఆయన యంగ్గా, ఫిట్గా కనిపించడం ఎంతోమందికి ఆదర్శం. ఇటీవల విడుదలైన ‘కూలీ’ చిత్రంలో ‘సైమన్’ అనే విలన్ పాత్రలో ఆయన నటనకు ప్రేక్షకుల నుండి విశేష స్పందన లభిస్తోంది. ఈ సందర్భంగా రజనీకాంత్ లాంటి అగ్ర నటుడు కూడా ’33 ఏళ్ల క్రితం ఎలా ఉన్నారో, ఇప్పటికీ నాగార్జున అలాగే ఉన్నారు’ అని ప్రశంసించడం విశేషం. ఇంతటి ఫిట్నెస్కు కారణం ఏమిటని అడిగినప్పుడు, నాగార్జున తన ఆరోగ్య రహస్యాలను పంచుకున్నారు.
వ్యాయామానికి అగ్ర ప్రాధాన్యం..
నాగార్జున ఫిట్నెస్కు ప్రధాన కారణం క్రమం తప్పకుండా వ్యాయామం చేయడమే. గత 35 ఏళ్లుగా ఈ అలవాటును ఆయన కఠినంగా పాటిస్తున్నారు. ఉదయాన్నే వ్యాయామంతోనే తన దినచర్య మొదలవుతుందని, దానికోసం అవసరమైతే ఏ సమావేశాలనైనా వాయిదా వేసుకుంటానని చెబుతారు.
విభిన్నమైన వర్కవుట్స్..
ఆయన వ్యాయామం అంటే కేవలం జిమ్లో బరువులు ఎత్తడమే కాదు. థ్రెడ్మిల్పై పరుగెత్తడం, స్విమ్మింగ్ చేయడం, నడవడం వంటివి రోజూ మార్చి చేస్తారు. హృదయ స్పందన రేటు 70 శాతం కంటే ఎక్కువగా ఉండే వర్కవుట్స్కు ప్రాధాన్యం ఇస్తారు.
ఆహారం, ఇంటర్మిటెంట్ ఫాస్టింగ్..
వ్యాయామంతో పాటు సరైన ఆహారం కూడా అంతే ముఖ్యమని నాగార్జున నమ్ముతారు. వయసుకు తగ్గట్టుగా ఆహారపు అలవాట్లను మార్చుకుంటూ వచ్చారు. ముఖ్యంగా, ఆయన ఇంటర్మిటెంట్ ఫాస్టింగ్ పద్ధతిని అనుసరిస్తారు.
ప్రశాంతమైన నిద్ర..
మంచి నిద్ర ఆరోగ్యాన్ని కాపాడుతుందని నాగార్జున దృఢంగా నమ్ముతారు. షూటింగ్ షెడ్యూల్స్ లేనప్పుడు త్వరగా నిద్రపోవడానికి ప్రయత్నిస్తారు. తద్వారా మరుసటి రోజు ఉత్సాహంగా, చురుకుగా ఉండవచ్చని ఆయన చెబుతారు.
ఆ ఒక్కరోజే నో డైట్..
ఆదివారం మాత్రం ఆయన తన డైట్కు మినహాయింపు ఇస్తారు. తనకు ఇష్టమైన స్వీట్స్, బిర్యానీ వంటివి తిని ఎంజాయ్ చేస్తారు. నాగార్జున ఈ ఆరోగ్య రహస్యాలు పాటిస్తూ యంగ్గా ఉండడం, వరుసగా కొత్త ప్రాజెక్ట్లు, విభిన్న పాత్రలు చేస్తూ ఉండడం ఆయన అభిమానులకు మరింత ఉత్సాహాన్నిస్తోంది.