Akhanda Roxx: ‘అఖండ రాక్స్’ బాలయ్య పవర్ ఫుల్ ఇమేజ్కు ప్రత్యేక వాహనం
Akhanda Roxx: మాస్ చిత్రాలకు కేరాఫ్ అడ్రస్గా నిలిచే నటసింహం నందమూరి బాలకృష్ణ, దర్శకుడు బోయపాటి శ్రీను కాంబినేషన్ అంటే బాక్సాఫీస్ వద్ద విజయం ఖాయం. వీరిద్దరి కలయికలో ఇప్పటికే మూడు బ్లాక్బస్టర్లు రావడంతో, నాలుగో చిత్రం ‘అఖండ 2’పై అంచనాలు తారాస్థాయికి చేరుకున్నాయి. డిసెంబర్ 5న పాన్ ఇండియా స్థాయిలో విడుదల కానున్న ఈ సినిమా ప్రమోషన్లలో భాగంగా, చిత్ర యూనిట్ తాజాగా ఒక ప్రత్యేకమైన వాహనాన్ని లాంచ్ చేసి సంచలనం సృష్టించింది.
‘అఖండ 2’ సినిమాలో బాలకృష్ణ పాత్ర కోసం ప్రత్యేకంగా డిజైన్ చేసిన ఈ వాహనం పేరు ‘అఖండ రాక్స్’. హైదరాబాద్లో జరిగిన గ్రాండ్ ఈవెంట్లో దర్శకుడు బోయపాటి శ్రీను తన కోర్ క్రియేటివ్ బృందంతో కలిసి ఈ వాహనాన్ని ఆవిష్కరించారు. XDrive అత్యాధునిక ఇంజినీరింగ్తో నిర్మించి, X Studios సినిమాటిక్ లుక్ను అందించిన ఈ వెహికిల్, బాలయ్య పవర్, మాస్ ఎనర్జీకి అద్దం పట్టేలా రూపుదిద్దుకుంది. బాలకృష్ణ స్క్రీన్ ప్రెజెన్స్కు తగ్గట్టుగా, కథనానికి సరిపోయే విధంగా ఈ శక్తివంతమైన వాహనాన్ని తీర్చిదిద్దారు.
ఈ సందర్భంగా దర్శకుడు బోయపాటి శ్రీను మాట్లాడుతూ.. వాహనం డిజైన్ పట్ల తన సంతృప్తిని వ్యక్తం చేశారు. “ఒక శక్తివంతమైన పాత్ర తెరపైకి వస్తుంటే, దానికి తగ్గట్టుగా ఒక ప్రత్యేకమైన ఆబ్జెక్ట్ ఉండాలి. మా హీరో క్యారెక్టర్ ఎంత పవర్ఫుల్గా ఉంటుందో, ఈ వాహనం కూడా అంత పవర్ఫుల్గా ఉంటుంది,” అని ఆయన తెలిపారు. ఈ వాహనాన్ని అత్యద్భుతంగా, పగలు రాత్రి కష్టపడి నాలుగు రోజుల్లో డిజైన్ చేసిన అమర్ ను ఆయన ప్రత్యేకంగా అభినందించారు.
“ఈ వాహనాన్ని వెండితెరపై చూసినప్పుడు ప్రేక్షకులు ఖచ్చితంగా మెస్మరైజ్ అవుతారు, చాలా గర్వంగా ఫీల్ అవుతారు,” అని బోయపాటి అన్నారు. అంతేకాకుండా, సినిమా గురించి చెబుతూ, “అఖండ 2 అనేది కేవలం సినిమా మాత్రమే కాదు, ఇది భారతదేశపు ఆత్మ” అని పేర్కొన్నారు. సినిమా చూసిన తర్వాత ప్రేక్షకులకు ఈ విషయం పూర్తిగా అర్థమవుతుందని ఆయన ఆశాభావం వ్యక్తం చేశారు. ఈ కామెంట్స్తో ‘అఖండ 2’పై అంచనాలు మరింత పెరిగాయి.