The Paradise: ‘ది ప్యారడైజ్’ కోసం రోజూ 3 గంటలే నిద్రపోయిన నాని.. అసలు కారణం ఇదే!
The The ParadiseParadise: టాలీవుడ్ నేచురల్ స్టార్ నాని, ‘దసరా’ వంటి బ్లాక్బస్టర్ అందించిన దర్శకుడు శ్రీకాంత్ ఓదెల కాంబినేషన్లో రూపొందుతున్న తాజా చిత్రం ‘ది ప్యారడైజ్’పై అభిమానుల్లో భారీ అంచనాలు నెలకొన్నాయి. సినిమా అనౌన్స్మెంట్ గ్లింప్స్లో నాని వాడిన పదునైన పదజాలం, యాక్షన్ టోన్ చూసి.. ఫ్యామిలీ ఆడియన్స్కు అలవాటైన నాని ఈసారి సరికొత్త అవతారంలోకి మారబోతున్నారని సినీ వర్గాలు విశ్లేషించాయి.
వాస్తవానికి ఈ చిత్రాన్ని వచ్చే ఏడాది మార్చి నెలలో విడుదల చేయాలని చిత్ర బృందం తొలుత ప్రణాళికలు సిద్ధం చేసుకుంది. అయితే, పలు అనివార్య కారణాల వల్ల సినిమా షూటింగ్ అనుకున్నంత వేగంగా సాగలేదు. దీంతో, విడుదల వాయిదా పడవచ్చనే ప్రచారం సినీ వర్గాలలో జోరుగా సాగింది.
ఈ క్రమంలోనే ‘ది ప్యారడైజ్’ చిత్రబృందంపై ఇప్పుడు భారీ ఒత్తిడి పెరుగుతోంది. దీనికి ప్రధాన కారణం, సినిమా విడుదల కావడానికి ముందే భారీ ధరకు అమ్ముడైన ఓటీటీ హక్కులే. ఓ ప్రముఖ ఓటీటీ సంస్థ ఈ సినిమా హక్కులను పెద్ద మొత్తంలో కొనుగోలు చేయడంతో పాటు, విడుదల కోసం ఒక కచ్చితమైన గడువు (డెడ్లైన్)ను కూడా విధించింది. ఆ గడువులోగా సినిమాను పూర్తి చేసి ఇవ్వాల్సిన బాధ్యత నిర్మాతలపై ఉంది.
ఓటీటీ సంస్థ డెడ్లైన్ను చేరుకోవడానికి, షూటింగ్ను వీలైనంత త్వరగా పూర్తి చేయడానికి చిత్ర బృందం రేయింబవళ్లు కష్టపడుతోంది. విశ్వసనీయ వర్గాల సమాచారం ప్రకారం, ప్రస్తుతం నాని మరియు టీం కేవలం రోజుకు 3 గంటలు మాత్రమే నిద్ర తీసుకుంటూ, మిగతా సమయమంతా షూటింగ్ కోసమే కేటాయిస్తున్నారు. ప్రస్తుతం హైదరాబాద్ శివారులోని ముచ్చింతల్లో ఒక భారీ ఫైట్ సీక్వెన్స్ను చిత్రీకరిస్తున్నారు. సినిమాను సకాలంలో పూర్తి చేసి, మార్చిలో ప్రేక్షకుల ముందుకు తీసుకురావడానికి నాని, శ్రీకాంత్ ఓదెల బృందం తీవ్రంగా శ్రమిస్తున్న తీరు అందరినీ ఆశ్చర్యపరుస్తోంది.