Nani: ఆ షర్ట్ నా జీవితాన్ని మార్చింది.. 17 ఏళ్ల నుండి జాగ్రత్తగా దాచుకుంటున్నా
Nani: సహజ నటుడు నాని, తన టాలెంట్‌తో స్టార్‌డమ్ సాధించడమే కాకుండా, తన సింప్లిసిటీతో ఎంతోమంది అభిమానుల హృదయాలను గెలుచుకున్నారు. ఎలాంటి సినీ బ్యాగ్రౌండ్ లేకుండా పరిశ్రమలోకి అడుగుపెట్టి, హీరోగా, విజయవంతమైన నిర్మాతగా తనకంటూ ఒక ప్రత్యేక స్థానాన్ని సంపాదించుకున్నారు నాని. తాజాగా ఆయన ప్రముఖ నటుడు జగపతి బాబు హోస్ట్ చేస్తున్న ‘జయమ్ము నిశ్చయమ్మురా’ టాక్ షోలో పాల్గొని, తన వ్యక్తిగత జీవితానికి సంబంధించిన ఎన్నో ఆసక్తికరమైన విషయాలను పంచుకున్నారు.
17 ఏళ్ల నాటి టీ-షర్ట్ జ్ఞాపకం..
ఈ షోలో ఒక ఆసక్తికరమైన సంఘటన జరిగింది. జగపతి బాబు నాని కోసం ఒక పాత టీ-షర్ట్‌ను తీసుకొచ్చి చూపించారు. ఆ షర్ట్‌ను చూసిన నాని ఒక్కసారిగా ఆశ్చర్యపోయి, భావోద్వేగానికి గురయ్యారు. 17 ఏళ్ల క్రితం ‘అష్టాచెమ్మా’ సినిమా ఆడిషన్స్ సమయంలో తాను ఈ షర్ట్‌ను ధరించానని గుర్తు చేసుకున్నారు. “ఆ రోజుల్లో ప్రొఫెషనల్ ఫోటోషూట్‌కు డబ్బులు లేవు. అందుకే ఇదే షర్ట్ వేసుకుని ఫోటోలు తీయించుకుని పంపించాను. ఆ ఫోటోలే నన్ను నటుడిగా ఎంపిక చేయడానికి కారణమయ్యాయి,” అని నాని తెలిపారు. అంతేకాకుండా, తన జీవిత భాగస్వామి అంజును మొదటిసారి కలిసినప్పుడు కూడా ఇదే షర్ట్ ధరించానని చెప్పారు. “అంజు ఇప్పటికీ ఈ షర్ట్‌ను జాగ్రత్తగా దాచుకుంది. అందుకే నాకు ఇది ఒక ప్రత్యేకమైన జ్ఞాపకం,” అని నాని ఎమోషనల్ అయ్యారు.
నిర్మాతగా కొత్త టాలెంట్‌కు ప్రోత్సాహం..
ప్రస్తుతం నాని ‘ది ప్యారడైజ్’ సినిమా షూటింగ్‌లో బిజీగా ఉన్నారు. ‘దసరా’, ‘హిట్ 3’ వంటి చిత్రాలతో ఘన విజయాలు సాధించిన నాని, నటుడిగానే కాకుండా, తన నిర్మాణ సంస్థ ద్వారా యువ ప్రతిభను ప్రోత్సహిస్తూ ముందుకు సాగుతున్నారు. ఈ సంఘటనతో నెటిజన్లు కూడా “నాని నిజంగానే నేచురల్ స్టార్, ఆయన నిరాడంబరత ఈ సంఘటనతో మరోసారి రుజువైంది,” అంటూ కామెంట్లు చేస్తున్నారు.