Nara Rohit: త్వరలో పప్పన్నం పెట్టబోతున్న నారా రోహిత్..!
Nara Rohit: తెలుగు చిత్ర పరిశ్రమలో తనదైన నటనతో ప్రత్యేక గుర్తింపు తెచ్చుకున్న నటుడు నారా రోహిత్. టీడీపీ అధినేత చంద్రబాబు నాయుడు సోదరుడి కుమారుడిగా సినీ రంగ ప్రవేశం చేసిన రోహిత్, ‘బాణం’, ‘ప్రతినిధి’ వంటి చిత్రాలతో సీరియస్ నటుడిగా ప్రశంసలు అందుకున్నారు. కొన్ని వరుస పరాజయాల తర్వాత, ఆయన కొంతకాలం విరామం తీసుకున్నారు. ఈ గ్యాప్లో తన లుక్లోనూ భారీ మార్పులు చేసుకున్నారు. తాజాగా ‘సుందరకాండ’ సినిమాతో రీ-ఎంట్రీ ఇచ్చి విజయాన్ని అందుకున్నారు. ఈ చిత్రం యువతతో పాటు కుటుంబ ప్రేక్షకులను ఆకట్టుకుంటోంది.
‘సుందరకాండ’ సక్సెస్ & నారా రోహిత్ రియాక్షన్..
సుదీర్ఘ విరామం తర్వాత వచ్చిన ఈ విజయం నారా రోహిత్కు ఎంతో ఆత్మవిశ్వాసాన్నిచ్చింది. ప్రస్తుతం ఆయన ప్రమోషన్స్లో చురుగ్గా పాల్గొంటున్నారు. గుంటూరులో జరిగిన ఒక ఈవెంట్లో, గణేశుడిని దర్శించుకున్న అనంతరం అభిమానులతో, మీడియాతో మాట్లాడారు. “ఇంతకాలం తర్వాత ప్రేక్షకుల నుంచి ఇంత మంచి స్పందన లభించడం ఎంతో సంతోషంగా ఉంది. ఈ విజయం నాకు మరింత నమ్మకాన్నిచ్చింది,” అని ఆయన తెలిపారు. ఈ సందర్భంగా, అభిమానులను ఆనందంలో ముంచెత్తుతూ, తన వ్యక్తిగత జీవితంపై ఒక శుభవార్తను పంచుకున్నారు.
పెళ్లిపై నారా రోహిత్..
నారా రోహిత్ తన పెళ్లి తేదీని అధికారికంగా ప్రకటించారు. “అక్టోబర్ చివరి వారంలో లేదా నవంబర్ మొదటి వారంలో నా పెళ్లి జరుగుతుంది,” అని ఆయన వెల్లడించారు. ‘ప్రతినిధి 2’ సినిమాలో హీరోయిన్గా నటించిన శిరీష (సిరి)తో రోహిత్కు గతంలోనే నిశ్చితార్థం జరిగినట్లు సమాచారం. అయితే, రోహిత్ తండ్రి ఆకస్మిక మరణంతో వివాహ వేడుక వాయిదా పడింది. ఇప్పుడు తిరిగి కొత్త తేదీని ఖరారు చేసినట్లు తెలుస్తోంది. ఇక తన తదుపరి సినిమాలు వివిధ జానర్లలో, అన్ని వర్గాల ప్రేక్షకులను అలరించేలా ఉంటాయని, వాటి వివరాలు త్వరలోనే వెల్లడిస్తానని రోహిత్ చెప్పారు. ‘సుందరకాండ’ విజయం నారా రోహిత్ కెరీర్కు మాత్రమే కాకుండా, వ్యక్తిగత జీవితానికి కూడా ఒక కొత్త మలుపునిచ్చింది.