NTR Neel: రాజమౌళి ఫార్ములాను ఫాలో అవుతున్న ఎన్టీఆర్-నీల్ టీమ్.. ‘టైటిల్ రివీల్ ఈవెంట్’ ఉంటుందా?
NTR Neel: భారతీయ చలనచిత్ర పరిశ్రమలో ఇప్పుడు ప్రమోషన్ స్ట్రాటజీ పూర్తిగా మారిపోయింది. ముఖ్యంగా అగ్ర దర్శకులు రాజమౌళి, ప్రశాంత్ నీల్ వంటి వారి ప్రాజెక్టుల విషయంలో ఈ మార్పు స్పష్టంగా కనిపిస్తోంది. ఇటీవల రాజమౌళి – మహేష్ బాబు కాంబినేషన్లో వస్తున్న అత్యంత ప్రతిష్టాత్మక చిత్రం ‘వారణాసి’ టైటిల్ను కేవలం ఒక పోస్టర్ ద్వారా కాకుండా, ఒక ప్రత్యేక వేదికపై అంగరంగ వైభవంగా జరిగిన ఈవెంట్ ద్వారా ప్రకటించిన సంగతి తెలిసిందే. ఈ ప్రయోగం కేవలం దేశవ్యాప్తంగానే కాక, అంతర్జాతీయ, హాలీవుడ్ మీడియా దృష్టిని కూడా ఆకర్షించి, గ్లోబల్ స్థాయిలో చర్చనీయాంశమైంది.
సాధారణంగా సోషల్ మీడియా పోస్టులు లేదా గ్లింప్స్లతో టైటిల్ ప్రకటించే ట్రెండ్కు భిన్నంగా, వారణాసి టైటిల్ రివీల్ ఈవెంట్ సినిమా థీమ్, పాత్రల స్వభావం, కథా నేపథ్యాన్ని ప్రేక్షకులకు స్పష్టంగా వివరించేందుకు ఉపయోగపడింది. ఈ వినూత్న ప్రమోషనల్ విధానం ఇప్పుడు ఇతర బిగ్గెస్ట్ ప్రాజెక్టులకు మార్గదర్శకంగా నిలుస్తోంది.
ఇప్పుడు ఇదే వ్యూహాన్ని యంగ్ టైగర్ ఎన్టీఆర్ – ప్రశాంత్ నీల్ కాంబినేషన్లో రూపొందుతున్న క్రేజీ ప్రాజెక్ట్ కోసం ఉపయోగించాలని మేకర్స్ యోచిస్తున్నట్లు తెలుస్తోంది. ఈ సినిమా టైటిల్ ఏమై ఉంటుందనే దానిపై సినీ వర్గాల్లో, అభిమానుల్లో భారీ ఆసక్తి నెలకొంది. ‘డ్రాగన్’ అనే పేరు ఈ సినిమాకు ఫిక్స్ అయ్యిందంటూ ఇటీవల సోషల్ మీడియాలో విపరీతంగా ప్రచారం జరిగింది.
అయితే దీనిపై ప్రముఖ నిర్మాణ సంస్థ మైత్రి మూవీ మేకర్స్ నిర్మాత రవిశంకర్ స్పష్టత ఇచ్చారు. “డ్రాగన్ అనేది కేవలం పరిశీలనలో ఉన్న ఓ ఆప్షన్ మాత్రమే. అధికారికంగా ఏ టైటిల్ కూడా ఇంకా ఖరారు కాలేదు,” అని ఆయన పేర్కొన్నారు. తమ ప్రాజెక్ట్ పూర్తిగా అంతర్జాతీయ స్థాయి ప్రమాణాలతో తెరకెక్కుతున్నందున, టైటిల్ మరియు ఫస్ట్ గ్లింప్స్ను వారణాసి ఈవెంట్కు ఏ మాత్రం తగ్గకుండా, భారీ స్థాయిలో, గ్రాండ్గా విడుదల చేయనున్నట్లు ఆయన వెల్లడించారు. ప్రశాంత్ నీల్ విజన్లో ఎన్టీఆర్ సరికొత్త అవతారంలో కనిపించబోతున్నారని ఆయన తెలిపారు.
ఈ భారీ ఈవెంట్ మోడల్ ద్వారా తమ కంటెంట్పై తప్పుడు అంచనాలు వెళ్లకుండా క్లారిటీ ఇవ్వడం, తక్కువ సమయంలో భారీ బజ్ క్రియేట్ చేయడం మరియు గ్లోబల్ ఆడియన్స్ను చేరుకోవడం వంటి ప్రయోజనాలు ఉన్నాయని పరిశ్రమ వర్గాలు అంచనా వేస్తున్నాయి. ఈ కొత్త ప్రమోషనల్ ట్రెండ్ ఎన్టీఆర్-నీల్ ప్రాజెక్ట్పై అంచనాలను తారాస్థాయికి చేర్చింది.