Peddi: రామ్చరణ్ ‘పెద్ది’ షూటింగ్ అప్డేట్: 1000 మంది డ్యాన్సర్లతో మాస్ సాంగ్ చిత్రీకరణ
Peddi: మెగా పవర్‌స్టార్ రామ్చరణ్ కథానాయకుడిగా తెరకెక్కుతున్న ప్రతిష్టాత్మక పాన్ ఇండియా చిత్రం ‘పెద్ది’ (Peddi) శరవేగంగా షూటింగ్ జరుపుకుంటోంది. వినాయక చవితి పర్వదినం సందర్భంగా చిత్ర బృందం ప్రేక్షకులకు శుభాకాంక్షలు తెలుపుతూ, సెట్స్ నుంచి ఓ ప్రత్యేక వీడియోను విడుదల చేసింది. ఈ వీడియో ప్రస్తుతం సోషల్ మీడియాలో వైరల్ అవుతోంది.
ప్రస్తుతం కర్ణాటకలోని మైసూరులో ‘పెద్ది’ తాజా షెడ్యూల్ చిత్రీకరణ జరుగుతోంది. ఇందులో భాగంగా, ఓ భారీ మాస్ సాంగ్‌ను చిత్రీకరిస్తున్నారు. ప్రముఖ కొరియోగ్రాఫర్ జానీ మాస్టర్ నృత్య దర్శకత్వంలో రూపొందుతున్న ఈ పాటలో రామ్‌చరణ్‌తో పాటు 1000 మందికి పైగా డ్యాన్సర్లు పాల్గొంటున్నారు. ఈ సాంగ్ సినిమాకే హైలైట్‌గా నిలుస్తుందని చిత్ర వర్గాలు చెబుతున్నాయి.
దర్శకుడు బుచ్చిబాబు సనా గ్రామీణ క్రీడా నేపథ్యంతో ఈ స్పోర్ట్స్ డ్రామాను తెరకెక్కిస్తున్నారు. ఇప్పటికే విడుదలైన ‘పెద్ది షాట్’ గ్లింప్స్ అభిమానులను విశేషంగా ఆకట్టుకుంది. ఇందులో రామ్చరణ్ క్రికెట్ ఆడే సన్నివేశం సినిమాపై భారీ అంచనాలు పెంచింది. ఈ చిత్రంలో రామ్చరణ్ సరసన బాలీవుడ్ బ్యూటీ జాన్వీ కపూర్ కథానాయికగా నటిస్తున్నారు. కన్నడ స్టార్ శివ రాజ్‌కుమార్, బాలీవుడ్ నటుడు దివ్యేందు శర్మలతో పాటు జగపతి బాబు వంటి ప్రముఖ నటులు కీలక పాత్రలు పోషిస్తున్నారు.
ఈ చిత్రానికి ఆస్కార్ విజేత ఏఆర్ రెహమాన్ సంగీత దర్శకత్వం వహిస్తున్నారు. ఈ సినిమాను మైత్రి మూవీ మేకర్స్, సుకుమార్ రైటింగ్స్ సమర్పణలో వృద్ధి సినిమాస్‌ పతాకంపై వెంకట సతీష్ కిలారు నిర్మిస్తున్నారు. ‘పెద్ది’ చిత్రం 2026 మార్చి 27న ప్రపంచవ్యాప్తంగా థియేటర్లలో విడుదల కానుంది.