Prabhass Mirai: ‘మిరాయ్’లో ప్రభాస్.. రెండు సినిమాలకు అండగా నిలిచిన పాన్ ఇండియా స్టార్
Prabhass Mirai: ఒక్కోసారి సినిమాలోని ప్రధాన పాత్రధారుల కంటే, అతిథి పాత్రల్లో మెరిసే స్టార్ల ఇంపాక్ట్ ప్రేక్షకులపై ఎక్కువగా ఉంటుంది. ఇటీవల అలాంటి ప్రభావాన్ని సృష్టించారు పాన్ ఇండియా స్టార్ ప్రభాస్. ఈ మధ్య కాలంలో ఆయన రెండు సినిమాలకు ప్రత్యేక పాత్రలు పోషించి వాటి విజయంలో కీలక పాత్ర పోషించారు. మంచు ఫ్యామిలీ నిర్మించిన ‘కన్నప్ప’, తేజ సజ్జా హీరోగా నటించిన ‘మిరాయ్’ సినిమాల విషయంలో ప్రభాస్ తీసుకున్న చొరవ ఇప్పుడు చర్చనీయాంశంగా మారింది.
మోహన్ బాబు, విష్ణు నటించి నిర్మించిన భారీ బడ్జెట్ చిత్రం ‘కన్నప్ప’. ఈ సినిమాలో ప్రభాస్ ఒక కీలకమైన అతిథి పాత్రలో కనిపించారు. ఆ పాత్ర నిడివి తక్కువే అయినప్పటికీ, ప్రభాస్ కనిపించినంత సేపు ప్రేక్షకులకు ఒక విజువల్ ట్రీట్ లభించిందని చెప్పవచ్చు. ఈ సినిమాలో ప్రభాస్ ఉండటం వల్ల ‘కన్నప్ప’కి మొదటి రోజు భారీ వసూళ్లు వచ్చాయని విశ్లేషకులు అభిప్రాయపడుతున్నారు.
ఇక తాజాగా విడుద‌లైన తేజ సజ్జా, మంచు మనోజ్ నటించిన ‘మిరాయ్’ చిత్రానికి కూడా ప్రభాస్ వాయిస్ ఓవర్ ఇచ్చారు. ఈ విషయాన్ని సినిమా యూనిట్ గోప్యంగా ఉంచింది. సినిమా విడుదల‌కు కొన్ని గంటల ముందు సోషల్ మీడియాలో అధికారికంగా ప్రకటించడంతో ఒక్కసారిగా ‘మిరాయ్’పై అంచనాలు పెరిగాయి. ఈ వాయిస్ ఓవర్ సినిమా కథనానికి మరింత బలాన్ని చేకూర్చిందని ప్రేక్షకులు చెబుతున్నారు.
ఈ సినిమాకు కార్తీక్ ఘట్టమనేని దర్శకత్వం వహించగా, పీపుల్ మీడియా ఫ్యాక్టరీ బ్యానర్‌పై టి.జి. విశ్వ ప్రసాద్, కృతి ప్రసాద్ నిర్మించారు. ఇలా కేవలం రెండు సినిమాలకు అతిథి పాత్రలు, వాయిస్ ఓవర్ ఇవ్వడం ద్వారా ప్రభాస్ ఆ సినిమాల క్రేజ్‌ను గణనీయంగా పెంచడంలో కీలక పాత్ర పోషించారు. సోషల్ మీడియాలో ప్రభాస్ ఫ్యాన్స్ ఈ రెండు సినిమాల విజయానికి కృషి చేయడం విశేషం.