Rajinikanth: నా నెక్ట్స్ మూవీ కమల్ బ్యానర్‌లోనే.. చెప్పేసిన సూపర్ స్టార్ రజినీకాంత్
Rajinikanth: సూపర్ స్టార్ రజనీకాంత్ తన తదుపరి చిత్రం గురించి ఒక ఆసక్తికరమైన విషయాన్ని వెల్లడించారు. ఈ దిగ్గజ నటుడు తన తర్వాతి ప్రాజెక్ట్.. ప్రముఖ నటుడు, నిర్మాత కమల్ హాసన్ సొంత నిర్మాణ సంస్థ ‘రాజ్ కమల్ ఫిల్మ్స్ ఇంటర్నేషనల్’లో ఉండబోతున్నట్లు స్పష్టం చేశారు. ఈ ప్రకటనతో, దాదాపు 30 ఏళ్ల తర్వాత ఈ ఇద్దరు లెజెండరీ నటులు మళ్లీ కలిసి నటిస్తారా అనే చర్చ సినీ వర్గాల్లో తీవ్రంగా సాగుతోంది.
ఇటీవలే ‘కూలీ’ చిత్రంతో ప్రేక్షకులను అలరించిన రజనీకాంత్ ప్రస్తుతం తన తదుపరి ప్రాజెక్ట్ ‘జైలర్ 2’ షూటింగ్‌లో బిజీగా ఉన్నారు. ఈ సినిమా షూటింగ్ కోసం కేరళలోని పాలక్కడ్ వెళుతున్న సందర్భంలో, చెన్నై విమానాశ్రయంలో మీడియా ప్రతినిధులతో రజనీ మాట్లాడారు. తన రాబోయే చిత్రం గురించి అడిగిన ప్రశ్నలకు ఆయన బదులిస్తూ, ‘రాజ్ కమల్ ఫిల్మ్స్ బ్యానర్‌లో నా తదుపరి సినిమా ఉంటుంది. అయితే ఈ ప్రాజెక్ట్ ఇంకా అధికారికంగా ఖరారు కాలేదు’ అని తెలిపారు.
రజనీకాంత్, కమల్ హాసన్ కలిసి ఒక సినిమాలో నటించాలని అభిమానులు చాలా కాలంగా ఎదురు చూస్తున్నారు. ఈ కోరికపై స్పందించిన రజనీకాంత్, ‘మేము కూడా అలాంటి ఒక ప్రాజెక్ట్ కోసం ఎదురుచూస్తున్నాం. మంచి కథ కుదిరినప్పుడు కచ్చితంగా కలిసి నటిస్తాం’ అని హామీ ఇచ్చారు. ప్రస్తుతం ఈ సినిమాకు సంబంధించి కథ, దర్శకుడు ఇంకా ఎంపిక కాలేదని, త్వరలోనే ఈ వివరాలను వెల్లడిస్తామని ఆయన పేర్కొన్నారు.
రజనీకాంత్, కమల్ హాసన్.. ఈ ఇద్దరు దిగ్గజాలు చివరిసారిగా 1990లో వచ్చిన ‘గర్జనై’ సినిమాలో కలిసి నటించారు. ఆ సినిమా తర్వాత వారిద్దరూ విడివిడిగా తమ తమ కెరీర్‌లో అగ్రస్థానాన్ని అధిరోహించారు. ఈ నేపథ్యంలో, మళ్లీ ఇప్పుడు కమల్ హాసన్ నిర్మాణంలో రజనీకాంత్ నటించనుండటం ఒక సంచలనాత్మక పరిణామంగా మారింది. ఈ సినిమాకు సంబంధించిన మరింత సమాచారం కోసం అభిమానులు, ప్రేక్షకులు ఆతృతగా ఎదురుచూస్తున్నారు.