Raju Gari Gadhi 4: రాజు గారి గది 4 అనౌన్స్‌మెంట్ వచ్చేసింది.. ఈసారి ఏ కాన్సెప్ట్ అంటే..
Raju Gari Gadhi 4: తెలుగు ప్రేక్షకులను భయపెట్టి, అలరించిన హారర్ ఫ్రాంచైజీ ‘రాజు గారి గది’ నాలుగో భాగంతో మళ్లీ రాబోతోంది. యాంకర్-దర్శకుడు ఓంకార్, సుదీర్ఘ విరామం తర్వాత ఈ సిరీస్‌లో కొత్త భాగాన్ని ప్రకటించారు. ఈ చిత్రానికి ‘రాజు గారి గది 4: శ్రీచక్రం’ అనే పవర్ ఫుల్ టైటిల్ ఖరారు చేశారు. ఈ చిత్రాన్ని ప్రముఖ నిర్మాణ సంస్థ పీపుల్ మీడియా ఫ్యాక్టరీ బ్యానర్‌పై రూపొందిస్తున్నారు.
తాజాగా విడుదలైన సినిమా ఫస్ట్ పోస్టర్ సోషల్ మీడియాలో వైరల్ అవుతోంది. పోస్టర్‌లో కాళికా మాత ఉగ్రరూపంలో దర్శనమివ్వడం, ఎర్రచీర కట్టుకున్న ఓ మహిళ దేవి విగ్రహం వైపు నడుచుకుంటూ వెళ్తుండటం వంటి హారర్, మిస్టికల్ ఎలిమెంట్స్ ఆసక్తిని పెంచుతున్నాయి. పోస్టర్‌కు జత చేసిన “A Divine Horror Begins” అనే ట్యాగ్ లైన్ ఈసారి కథాంశంపై మరింత ఉత్కంఠను రేకెత్తిస్తోంది.
భక్తి, భయం, హాస్యం కలబోత
ఈసారి కథా నేపథ్యం కేవలం హారర్‌కే పరిమితం కాకుండా, భక్తి (డివైన్) అంశాలను జోడించి ఓ సరికొత్త అనుభూతిని ఇవ్వనుంది. ‘కాళికాపురం’ అనే ఊరిలోని కాళికా మాత ఆలయం, శ్రీచక్రం మహిమ, భక్తి కారణంగా మేల్కొనే అమ్మవారు వంటి అంశాలతో హారర్, థ్రిల్లర్, కామెడీని మిక్స్ చేస్తూ ఓ కొత్త *’డివైన్ యూనివర్స్‌’*ను నిర్మించనున్నట్టు చిత్రబృందం ప్రకటించింది.
2015లో వచ్చిన ‘రాజు గారి గది’ విజయం సాధించగా, ఆ తర్వాత వచ్చిన ‘రాజు గారి గది 2’ (2017), ‘రాజు గారి గది 3’ (2019) చిత్రాలు ప్రేక్షకులను అంతగా ఆకట్టుకోలేకపోయాయి. అందుకే ఓంకార్ కొన్నాళ్లు విరామం తీసుకుని, ఈసారి కొత్త, విలక్షణమైన కాన్సెప్ట్‌తో మళ్లీ పలకరించేందుకు సిద్ధమవుతున్నారు.
‘రాజు గారి గది 4: శ్రీచక్రం’ సినిమాను 2026 దసరా పండుగ సందర్భంగా గ్రాండ్‌గా విడుదల చేయాలని ప్లాన్ చేస్తున్నారు. ప్రస్తుతం స్క్రిప్ట్ వర్క్ జరుగుతోంది. ఈ స్క్రిప్టింగ్ పూర్తయిన తర్వాత రెగ్యులర్ షూటింగ్ ప్రారంభం కానుంది. ఈ కొత్త కథాంశం ప్రేక్షకుల అంచనాలను అందుకుంటుందని చిత్రబృందం విశ్వాసం వ్యక్తం చేస్తోంది. కాస్టింగ్ వివరాలను త్వరలో వెల్లడించనున్నారు.