Ranbir Kapoor: ‘కుటుంబ పేరు సాయం చేసింది.. కానీ సక్సెస్ కోసం పడ్డ కష్టం ఎవరికీ తెలీదు’
Ranbir Kapoor: బాలీవుడ్‌లో తనకంటూ ప్రత్యేక స్థానాన్ని సంపాదించుకున్న నటుడు రణ్‌బీర్‌ కపూర్, భాషా హద్దులు చెరిపేస్తూ వరుస విజయాలతో దూసుకుపోతున్నారు. దిగ్గజ కపూర్ కుటుంబ నేపథ్యం నుంచి వచ్చినప్పటికీ, సినీ పరిశ్రమలో వ్యక్తిగత గుర్తింపు, విజయాల వెనుక తాను పడిన కష్టం గురించి రణ్‌బీర్‌ ఇటీవల ఆసక్తికర వ్యాఖ్యలు చేశారు.
“నిజం చెప్పాలంటే, నా కుటుంబ గుర్తింపు సినీ పరిశ్రమలోకి రావడానికి నాకు నిస్సందేహంగా సహాయపడింది. అయితే, ఆ తరువాత విజయాన్ని సాధించడం, ఆ విజయాలను నిలబెట్టుకోవడం కోసం నేను అవిశ్రాంతంగా కృషి చేయాల్సి వచ్చింది,” అని రణ్‌బీర్‌ ఒక ఇంటర్వ్యూలో పేర్కొన్నారు.
తాను ఒక పెద్ద సినీ నేపథ్యం ఉన్న కుటుంబం నుంచి వచ్చాను కాబట్టి, తనకంటూ ఒక ప్రత్యేక గుర్తింపు తెచ్చుకోవాలని మొదటి నుంచీ భావించానని రణ్‌బీర్‌ తెలిపారు. ఆ విధంగా సొంత గుర్తింపును సాధించలేకపోతే, ఈ పోటీ ప్రపంచంలో విజయం దక్కదనే వాస్తవాన్ని తాను త్వరగానే గ్రహించానని ఆయన వెల్లడించారు.
“చాలామందికి మా కుటుంబం సాధించిన అద్భుత విజయాల గురించే తెలుసు. కానీ, ఏ కుటుంబానికైనా ఉన్నట్లే, మా ఫ్యామిలీ కూడా ఎన్నో వైఫల్యాలను ఎదుర్కొంది. ఆ వైఫల్యాల నుంచి ఎన్నో ముఖ్యమైన పాఠాలను నేర్చుకున్నాను. ఆ అనుభవాలే ఈ రోజు నేను ఈ స్థాయిలో నిలబడటానికి సాయపడ్డాయి,” అని ఆయన గతాన్ని గుర్తుచేసుకున్నారు. కేవలం కుటుంబ వారసత్వంపై ఆధారపడకుండా, తన ప్రతిభ, కష్టం ద్వారానే ఈ స్థాయికి చేరుకున్నానని పరోక్షంగా రణ్‌బీర్‌ స్పష్టం చేశారు.
లెజెండరీ నటుడు రాజ్‌ కపూర్ మనవడిగా, దివంగత నటుడు రిషి కపూర్ కుమారుడిగా రణ్‌బీర్‌ కపూర్ చలనచిత్ర పరిశ్రమలో అడుగుపెట్టారు. హీరోగా పరిచయం కాకముందు అసిస్టెంట్ డైరెక్టర్‌గా పనిచేసిన ఆయన, 2007లో హీరోగా అరంగేట్రం చేశారు. ఇటీవల సందీప్ వంగా దర్శకత్వంలో వచ్చిన ‘యానిమల్‌’ సినిమాతో దేశవ్యాప్తంగా విమర్శకుల ప్రశంసలు అందుకున్నారు. ప్రస్తుతం ఆయన సంజయ్ లీలా భన్సాలీ దర్శకత్వం వహిస్తున్న ‘లవ్ అండ్ వార్’ అనే ప్రతిష్ఠాత్మక ప్రాజెక్టులో నటిస్తున్నారు. అలాగే, నితీశ్‌ తివారీ ప్రతిభావంతంగా తెరకెక్కిస్తున్న ‘రామాయణ’ చిత్రంలో ఆయన రాముడి పాత్రను పోషించనుండటం విశేషం.