Dhurandhar: రణ్వీర్ సింగ్ ‘ధురంధర్’ రన్టైమ్ ఏంతంటే.. దర్శకుడు ఏమన్నాడు?
Dhurandhar: బాలీవుడ్ స్టార్ నటుడు రణ్వీర్ సింగ్ టైటిల్ పాత్ర పోషిస్తున్న భారీ యాక్షన్ థ్రిల్లర్ చిత్రం ‘ధురంధర్’ ప్రస్తుతం సినీ వర్గాల్లో హాట్ టాపిక్గా మారింది. ప్రముఖ దర్శకుడు ఆదిత్య ధర్ రూపొందిస్తున్న ఈ చిత్రం డిసెంబర్ 5న ప్రేక్షకుల ముందుకు రానుంది. సినిమా విడుదల తేదీ దగ్గర పడుతుండటంతో, దీనికి సంబంధించిన పలు వార్తలు సోషల్ మీడియాలో విపరీతంగా చక్కర్లు కొడుతున్నాయి.
ముఖ్యంగా ఈ సినిమా నిడివి (రన్టైమ్) గురించి వస్తున్న ఊహాగానాలు అందరి దృష్టినీ ఆకర్షిస్తున్నాయి. బాలీవుడ్ మీడియా వర్గాలు ఈ సినిమా నిడివి దాదాపు 3 గంటల 32 నిమిషాలుగా ఉండవచ్చని పేర్కొంటున్నాయి. ఒకవేళ ఈ వార్త నిజమైతే, ‘ధురంధర్’ అత్యంత ఎక్కువ నిడివి కలిగిన భారతీయ చిత్రాల జాబితాలో చేరిపోవడం ఖాయం. నేటితరం ప్రేక్షకులు మూడు గంటలకు పైబడిన నిడివిని ఆదరిస్తారా లేదా అనే అంశంపై సినీ విశ్లేషకుల మధ్య చర్చ జరుగుతోంది.
ఇదిలా ఉండగా ఈ చిత్రం గురించి మరో కీలకమైన ప్రచారం జరిగింది. ‘ధురంధర్’ సినిమా మేజర్ మోహిత్ శర్మ జీవితం ఆధారంగా తెరకెక్కిందని విస్తృతంగా వార్తలు వచ్చాయి. దీనిపై దర్శకుడు ఆదిత్య ధర్ తాజాగా స్పష్టత ఇచ్చారు. ఈ సినిమా ఎవరి జీవిత చరిత్ర (బయోపిక్) కాదని ఆయన ఖండించారు.
ఈ సందర్భంగా ఆయన మాట్లాడుతూ… “మేజర్ మోహిత్ శర్మ దేశం కోసం చేసిన త్యాగాన్ని మనం ఎప్పటికీ మర్చిపోలేం. భవిష్యత్తులో ఆయనపై బయోపిక్ తీయాల్సి వస్తే, వారి కుటుంబ సభ్యుల అనుమతి తీసుకుని అధికారికంగా ప్రకటిస్తాను. ఆ బయోపిక్ను చాలా గౌరవంగా, బాధ్యతతో రూపొందిస్తాను. కానీ, ప్రస్తుతం విడుదల కాబోతున్న ‘ధురంధర్’ చిత్రంలో మాత్రం ఆయన గురించి కానీ, ఆయన జీవితాన్ని కానీ చూపించలేదు” అని స్పష్టం చేశారు. ఈ యాక్షన్ థ్రిల్లర్ చిత్రం రణ్వీర్ సింగ్ కెరీర్లో ఒక ప్రత్యేకమైన ప్రయత్నంగా నిలిచే అవకాశం ఉంది. దీని రన్టైమ్పై వస్తున్న వార్తలు, బయోపిక్ కాదన్న దర్శకుడి ప్రకటన.. ఇవన్నీ సినిమాపై మరింత ఉత్సుకతను పెంచుతున్నాయి.