Ranveer Singh: సౌత్ డైరెక్టర్లపై బాలీవుడ్ స్టార్ల చిన్నచూపు.. ఆ దర్శకుడి రెండేళ్లు టైం వేస్ట్ చేసిన రణ్‌వీర్‌ సింగ్..
Ranveer Singh: భారతీయ సినిమా ఇప్పుడు ప్యాన్ ఇండియా స్థాయిలో విస్తరిస్తోంది. దక్షిణాది సినిమాలు ఉత్తరాది ప్రేక్షకులను ఆకట్టుకుంటుంటే, అక్కడి దర్శకులకు కూడా బాలీవుడ్ నుంచి అవకాశాలు వస్తున్నాయి. కానీ, ఇటీవల కాలంలో బాలీవుడ్ స్టార్ హీరోలకు, దక్షిణాది దర్శకులకు మధ్య కొన్ని సమస్యలు వస్తున్నాయని వార్తలు వస్తున్నాయి. ఈ రెండు పరిశ్రమల మధ్య సహకారం కొరవడుతోందని, అందుకు బాలీవుడ్ స్టార్ల వైఖరే కారణమని సినీ వర్గాల్లో చర్చ జరుగుతోంది.
తాజాగా, బాలీవుడ్ దర్శకుడు అనురాగ్ కశ్యప్ చేసిన వ్యాఖ్యలు ఈ చర్చకు మరింత బలం చేకూర్చాయి. మలయాళీ దర్శకుడు, నటుడు బాసిల్ జోసెఫ్ తో తన సంభాషణ గురించి అనురాగ్ కశ్యప్ ఒక యూట్యూబ్ ఇంటర్వ్యూలో పంచుకున్నారు. రణవీర్ సింగ్ తో కలిసి ‘శక్తిమాన్’ ప్రాజెక్ట్ కోసం బాసిల్ జోసెఫ్ దాదాపు రెండేళ్లు ఎదురుచూసి, చివరికి ఆ ప్రాజెక్ట్ నుంచి బయటకు వచ్చారని అనురాగ్ తెలిపారు. “బాసిల్ నన్ను కలిసి, ‘బాలీవుడ్‌లో ఎలా బతుకుతున్నారు?’ అని అడిగాడు. దానికి నేను ‘బతకలేకే బయటకు వచ్చేశాను’ అని చెప్పాను” అని అనురాగ్ కశ్యప్ చెప్పారు. ఈ సంఘటన రణవీర్ సింగ్, బాసిల్ జోసెఫ్‌ల మధ్య క్రియేటివ్ డిఫరెన్సెస్ వచ్చినట్లు గతంలో వచ్చిన వార్తలకు బలం చేకూర్చింది.
ఇలాంటి పరిస్థితులు ఎదుర్కొంటున్నది కేవలం బాసిల్ జోసెఫ్ మాత్రమే కాదు. ఇటీవల, తమిళ దర్శకుడు ఏ.ఆర్. మురుగుదాస్ తన ‘సికిందర్’ సినిమా పరాజయం గురించి మాట్లాడుతూ, దానికి సల్మాన్ ఖాన్ జోక్యం చేసుకోవడమే కారణమని కుండబద్దలు కొట్టారు. అలాగే, టాలీవుడ్ దర్శకుడు ప్రశాంత్ వర్మ రణవీర్ సింగ్‌తో చేయాలనుకున్న ‘రాక్షస’ ప్రాజెక్ట్ కూడా ఇదే కారణంతో ఆగిపోయిందని వార్తలు వచ్చాయి. బాలీవుడ్ నటి దీపికా పడుకొనే కూడా ఒక తెలుగు దర్శకుడితో ప్రాజెక్ట్ విషయంలో క్రియేటివ్ డిఫరెన్సెస్‌తో వైదొలిగింది.
ఈ వరుస సంఘటనలు చూస్తుంటే, బాలీవుడ్ స్టార్లకు, దక్షిణాది దర్శకులకు మధ్య క్రియేటివ్ డిఫరెన్సెస్ తరచూ వస్తున్నట్లు అర్థమవుతోంది. దర్శకుల విజన్‌కు ప్రాధాన్యత ఇవ్వకుండా, తమ ఇష్టానుసారం మార్పులు చేయాలని స్టార్ హీరోలు ఒత్తిడి చేస్తున్నారనే ఆరోపణలు వినిపిస్తున్నాయి. ఇది నిజంగానే ఇరు పరిశ్రమల మధ్య సహకారాన్ని దెబ్బతీస్తుందనడంలో సందేహం లేదు.