Ritika Nayak: టాలీవుడ్ బిజీ బిజీగా మిరాయ్ హీరోయిన్.. రితికా నాయక్ అప్‌కమింగ్ ప్రాజెక్ట్స్ తెలుసా?
Ritika Nayak: యంగ్ బ్యూటీ రితికా నాయక్, తెలుగు చిత్ర పరిశ్రమలో తనకంటూ ఒక ప్రత్యేక స్థానాన్ని ఏర్పరచుకోవడానికి ప్రయత్నిస్తున్నారు. తన తొలి సినిమాతోనే మంచి గుర్తింపు తెచ్చుకున్న ఈ నటి, ఇప్పుడు వరుస ప్రాజెక్టులతో బిజీగా ఉన్నారు. సెప్టెంబర్ 12న విడుదల కానున్న తన తాజా చిత్రం ‘మిరాయ్’తో ప్రేక్షకులను అలరించడానికి సిద్ధమవుతున్నారు. ఈ సందర్భంగా ఆమె వ్యక్తిగత జీవితం, సినీ ప్రయాణానికి సంబంధించిన ఆసక్తికరమైన విషయాలను తెలుసుకుందాం.
ఢిల్లీ నుంచి టాలీవుడ్‌కు రితికా నాయక్ ప్రయాణం..
1997 అక్టోబర్ 27న ఢిల్లీలో ఒడియా కుటుంబంలో జన్మించిన రితికా నాయక్, అక్కడే తన విద్యాభ్యాసాన్ని పూర్తి చేశారు. విమెన్ శ్యామ ప్రసాద్ ముఖర్జీ కాలేజీలో డిగ్రీ పూర్తి చేసిన రితికా, 2019లో మోడలింగ్ రంగంలో అడుగుపెట్టారు. అదే ఏడాది ‘టైమ్స్ ఫ్రెష్ ఫేస్ 2019’ టైటిల్‌ను గెలుచుకుని, సినీ రంగంలో అడుగుపెట్టేందుకు ప్రయత్నాలు ప్రారంభించారు. అనేక ఆడిషన్స్ తర్వాత, 2022లో విశ్వక్ సేన్ నటించిన ‘అశోకవనంలో అర్జున కళ్యాణం’ చిత్రంలో సెకండ్ హీరోయిన్‌గా అవకాశం దక్కించుకున్నారు. తన నటనతో తొలి సినిమాలోనే తెలుగు ప్రేక్షకులను ఆకట్టుకున్నారు.
వరుస సినిమాలు, ఫొటోషూట్లతో బిజీ..
‘అశోకవనంలో అర్జున కళ్యాణం’ తర్వాత రితికాకు అవకాశాలు వెల్లువెత్తాయి. ప్రస్తుతం ఆమె మూడు సినిమాలతో బిజీగా ఉన్నారు. సెప్టెంబర్ 12న విడుదల కానున్న ‘మిరాయ్’తో పాటు, ఆనంద్ దేవరకొండతో ‘డ్యూయెట్’, వరుణ్ తేజ్‌తో ‘VT15’ వంటి ప్రాజెక్టులలో కూడా నటిస్తున్నారు. ఈ సినిమాల షూటింగ్‌లతో బిజీగా ఉన్న రితికా, మరోవైపు సోషల్ మీడియాలో అందమైన ఫొటోషూట్లతో అభిమానులను ఆకట్టుకుంటున్నారు. తన కెరీర్ పట్ల పూర్తి అంకితభావంతో ఉన్న ఈ యంగ్ హీరోయిన్, త్వరలోనే టాలీవుడ్‌లో ఒక స్టార్‌గా ఎదిగే అవకాశం ఉందని సినీ విశ్లేషకులు భావిస్తున్నారు.