Sharwanand: శర్వానంద్ సరికొత్త ప్రయాణం.. ‘OMI’ పేరుతో యంగ్ హీరో సరికొత్త సంస్థ
Sharwanand: టాలీవుడ్‌ కథానాయకుడు శర్వానంద్ తన సినీ కెరీర్‌లో ఓ కొత్త అధ్యాయానికి శ్రీకారం చుట్టారు. కేవలం నటుడిగానే కాకుండా, నిర్మాతగా కూడా తనకంటూ ఒక ప్రత్యేక స్థానాన్ని సంపాదించుకోవాలనే లక్ష్యంతో ఆయన ‘OMI’ అనే మల్టీ డైమెన్షనల్‌ సంస్థను స్థాపించారు. ఇది కేవలం సినిమా నిర్మాణానికి మాత్రమే పరిమితం కాకుండా, వెల్‌నెస్‌ ప్రొడక్ట్స్‌, హాస్పిటాలిటీ వంటి రంగాల్లోనూ తన సేవలను విస్తరించనుంది. ఈ సంస్థ లోగోను భారత మాజీ ఉపరాష్ట్రపతి ఎం. వెంకయ్య నాయుడు మంగళవారం ఆవిష్కరించారు. ఈ సందర్భంగా ఆయన శర్వానంద్‌కు శుభాకాంక్షలు తెలియజేస్తూ, ‘OMI’ భవిష్యత్తులో ఎంతో మంది ప్రతిభావంతులకు వేదిక అవుతుందని ప్రశంసించారు.
ఈ కొత్త సంస్థను ప్రారంభించడం పట్ల శర్వానంద్ తన ఆలోచనలను పంచుకున్నారు. “OMI నా విజన్‌, నా బాధ్యత. ఇది కేవలం ఒక కంపెనీ కాదు, క్రియేటివిటీకి పునాది. ప్రపంచవ్యాప్తంగా ఉన్న ఆర్టిస్టులకు, క్రియేటర్లకు ఇదొక వేదికగా నిలుస్తుంది. కొత్త కథలు చెప్పేందుకు, వినూత్న ఆలోచనలను పరిచయం చేసేందుకే ఈ ప్రయాణం” అని ఆయన అన్నారు. ఈ ప్రయాణాన్ని తాను ఒంటరిగా ప్రారంభిస్తున్నానని, అయితే నిజాయితీ, సంకల్పంతో ముందుకు సాగుతున్నానని తెలిపారు. ప్రతి అడుగు బాధ్యతతో వేస్తున్నట్లు చెప్పారు.
శర్వానంద్ ప్రస్తుతం బిజీ..
ప్రస్తుతం శర్వానంద్ ‘నారీ నారీ నడుమ మురారి’ అనే సినిమా షూటింగ్‌లో బిజీగా ఉన్నారు. ఈ చిత్రం వచ్చే ఏడాది జనవరిలో విడుదల కానుంది. ఇందులో ఆయన ఒక విభిన్నమైన పాత్రలో కనిపించనున్నారు. అలాగే, బైక్ రేసింగ్ నేపథ్యంలో రూపొందుతున్న మరో యాక్షన్ ఎంటర్‌టైనర్‌లో కూడా ఆయన నటిస్తున్నారు. ‘భోగి’ అనే విభిన్న కాన్సెప్ట్‌తో మరో సినిమా ప్రీ-ప్రొడక్షన్ దశలో ఉంది. ఈ చిత్రాలు పూర్తి కాకముందే నిర్మాతగా తన సృజనాత్మకతను విస్తరించాలని ఆయన నిర్ణయించుకున్నారు.
నటుడిగా ఎన్నో విజయాలు సాధించిన శర్వానంద్ ఇప్పుడు కొత్త తరం నిర్మాతగా మారడానికి సిద్ధమవుతున్నారు. ‘OMI’ ద్వారా ఆయన ప్రేక్షకుల ముందుకు తీసుకురాబోయే కంటెంట్‌పై సినీ వర్గాల్లో భారీ అంచనాలు నెలకొన్నాయి. కేవలం సినిమాలతోనే కాకుండా, వెల్‌నెస్‌, హాస్పిటాలిటీ రంగాల్లో కూడా ఆయన తన బ్రాండ్‌ను విస్తరించడం ద్వారా తన వ్యాపార నైపుణ్యాన్ని చాటుకోనున్నారు.