Shilpa Shirodkar: ‘జటాధర’ నుంచి శిల్పా శిరోద్కర్ ఫస్ట్ లుక్ వచ్చేసింది..!
Shilpa Shirodkar: యంగ్ హీరో సుధీర్ బాబు కథానాయకుడిగా నటిస్తున్న ద్విభాషా చిత్రం ‘జటాధర’. ఈ చిత్రానికి వెంకట్ కళ్యాణ్, అభిషేక్ జైస్వాల్ సంయుక్తంగా దర్శకత్వం వహిస్తున్నారు. తెలుగు, హిందీ భాషల్లో రూపొందుతున్న ఈ సినిమాలో బాలీవుడ్ నటి సోనాక్షి సిన్హా తెలుగు తెరకు కథానాయికగా పరిచయమవుతున్నారు. ప్రస్తుతం శరవేగంగా షూటింగ్ జరుపుకుంటున్న ఈ సినిమా నుంచి తాజాగా ఒక కీలక అప్‌డేట్ విడుదలైంది.
ఈ చిత్రంలో బాలీవుడ్ నటి శిల్పా శిరోద్కర్ ఒక ముఖ్యమైన పాత్రలో నటిస్తున్నట్లు చిత్రబృందం ప్రకటించింది. ఈ సందర్భంగా శోభ అనే పాత్రలో ఆమె ఫస్ట్‌లుక్‌ను విడుదల చేశారు. ఫస్ట్‌లుక్‌ పోస్టర్‌లో శిల్పా శిరోద్కర్ చాలా పవర్‌ఫుల్, ఇంటెన్స్ లుక్‌లో కనిపిస్తున్నారు. చాలా కాలం తర్వాత ఆమె ఇంత శక్తివంతమైన పాత్రలో కనిపించబోతున్నారని అభిమానులు ఆనందం వ్యక్తం చేస్తున్నారు.
గతంలో విడుదలైన ‘జటాధర’ టీజర్‌కు ప్రేక్షకుల నుంచి మంచి స్పందన లభించింది. సుధీర్ బాబు లుక్, సినిమా కాన్సెప్ట్ ప్రేక్షకులను ఆకట్టుకున్నాయి. ఈ చిత్రానికి వెంకట్ కళ్యాణ్ కథను అందిస్తుండగా, వెంకట్ కళ్యాణ్, అభిషేక్ జైస్వాల్ సంయుక్తంగా దర్శకత్వం వహిస్తున్నారు. సోనాక్షి సిన్హా, శిల్పా శిరోద్కర్ వంటి బాలీవుడ్ తారలు ఈ ప్రాజెక్ట్‌లో భాగం కావడంతో సినిమాపై అంచనాలు భారీగా పెరిగాయి. ఈ చిత్రం త్వరలోనే ప్రేక్షకుల ముందుకు రానుంది.
ఈ సినిమా టీజర్‌ను పాన్ ఇండియా స్టార్ ప్రభాస్ ఆన్‌లైన్‌లో విడుదల చేయగా, అది సోషల్ మీడియాలో వైరల్‌గా మారింది. ‘జటాధర’ టీజర్ చూస్తుంటే, ఇది ఒక మైథలాజికల్, సూపర్‌ నేచురల్ థ్రిల్లర్‌గా రూపొందినట్లు స్పష్టం అవుతోంది. ముఖ్యంగా, “శివుని జటల నుండి ప్రళయం ఉద్భవించినపుడు, అధర్మానికి అంతం ఖాయం” వంటి శక్తివంతమైన డైలాగులు సినిమాపై అంచనాలను పెంచాయి.
https://x.com/Shilpashirodkr/status/1960971227318903140
ఈ సినిమా కథ అనంత పద్మనాభ స్వామి ఆలయం, దాని చుట్టూ ఉన్న రహస్యాలు, పురాణ కథలు, నిధుల చుట్టూ అల్లుకున్న వివాదాల నేపథ్యంలో ఉంటుందని తెలుస్తోంది. ఇందులో సుధీర్ బాబు పాత్ర చాలా భిన్నంగా ఉండబోతోందని, సోనాక్షి సిన్హా పాత్ర కూడా కథలో కీలకం అని టీజర్ సూచిస్తోంది.