SS Rajamouli: చిరు అలా చేయకపోవడం బాధాకరం.. అందుకే చరణ్‌తో చేయించా..!
SS Rajamouli: భారతీయ సినిమా చరిత్రలో తనకంటూ ఒక ప్రత్యేక స్థానాన్ని సంపాదించుకున్న దర్శకుడు ఎస్.ఎస్. రాజమౌళి. ఆయన సినిమాలు కేవలం భారీ బడ్జెట్‌తో మాత్రమే కాకుండా, ప్రేక్షకులను భావోద్వేగంగా కదిలించే కథనాలతో కూడా గొప్ప విజయాలను సాధిస్తాయి. ఇటీవల ఒక ఇంటర్వ్యూలో, తన దర్శకత్వంలో వచ్చిన బ్లాక్‌బస్టర్ సినిమా మగధీరలోని ఒక కీలక సన్నివేశం వెనుక ఉన్న స్ఫూర్తి గురించి రాజమౌళి పంచుకున్నారు. ఆ సన్నివేశానికి ప్రేరణ మెగాస్టార్ చిరంజీవి నటించిన కొదమ సింహం అని ఆయన వివరించారు.
చిరంజీవికి తాను పెద్ద అభిమానినని చెప్పిన రాజమౌళి, చాలా ఏళ్ల క్రితం కొదమ సింహం సినిమా థియేటర్‌లో చూస్తున్నప్పుడు జరిగిన ఒక సంఘటనను గుర్తు చేసుకున్నారు. ఆ సినిమాలో విలన్లు చిరంజీవిని ఇసుకలో పాతిపెట్టే సన్నివేశంలో, ఆయన గుర్రం వచ్చి తన యజమానిని కాపాడుతుంది. ఆ సన్నివేశం చూసినప్పుడు తాను చాలా భావోద్వేగానికి లోనయ్యానని రాజమౌళి చెప్పారు. అయితే, ఆ కష్టంలోంచి బయటపడిన తర్వాత చిరంజీవి, గుర్రం మధ్య ఎటువంటి అనుబంధం చూపించకపోవడం తనని నిరుత్సాహపరిచిందని పేర్కొన్నారు. ప్రేక్షకుడిగా ఆ సన్నివేశంలో తన భావోద్వేగం సంపూర్ణం కాలేదని ఆయన తెలిపారు. ఒక వ్యక్తి మనకు సహాయం చేసినప్పుడు కృతజ్ఞత చెప్పకుండా ఆ ఎమోషన్ ఎలా పూర్తి అవుతుందని తనకు అనిపించిందని, ఆ ఆలోచన తన మనసులో అలాగే ఉండిపోయిందని వివరించారు.
ఆ అనుభవం నుంచే మగధీరలో రామ్‌చరణ్ ఇసుక ఊబిలో చిక్కుకున్న తర్వాత బయటపడి, తన గుర్రాన్ని ఆప్యాయంగా కౌగలించుకునే సన్నివేశాన్ని సృష్టించినట్లు రాజమౌళి వెల్లడించారు. ఒక స్నేహితుడితో మాట్లాడినట్లుగా ఆ గుర్రంతో కృతజ్ఞతతో కూడిన మాటలు పలికిస్తారని తెలిపారు. “నా సినిమాల్లో బలమైన సన్నివేశాలు తరచుగా ప్రేక్షకుడి కోణం నుంచే పుడతాయి” అని ఆయన చెప్పుకొచ్చారు.
ప్రస్తుతం రాజమౌళి, సూపర్ స్టార్ మహేష్ బాబుతో చేస్తున్న తన తదుపరి చిత్రం #SSMB29 పనిలో నిమగ్నమై ఉన్నారు. ఈ యాక్షన్-అడ్వెంచర్ ప్రాజెక్టులో ప్రియాంక చోప్రా, పృథ్వీరాజ్ సుకుమారన్ వంటి ప్రముఖులు కీలక పాత్రలు పోషిస్తున్నారు. అత్యంత భారీ బడ్జెట్‌తో తెరకెక్కుతున్న ఈ సినిమా మొదటి లుక్ నవంబర్‌లో విడుదలయ్యే అవకాశం ఉందని వార్తలు వస్తున్నాయి. మరోవైపు, రామ్‌చరణ్ తన తదుపరి చిత్రం పెద్ది చిత్రీకరణలో బిజీగా ఉన్నారు.