Peddi Reddy Song: యూట్యూబ్‌లో దుమ్మురేపుతున్న ‘పేరుగ‌ల్ల పెద్దిరెడ్డి’.. లిరిక్స్ అద్భుతమంటూ కామెంట్లు
Peddi Reddy Song: తెలంగాణ జానపద కళారంగంలో తన పాటలు, ఉత్సాహభరితమైన నృత్యంతో ప్రత్యేక స్థానాన్ని సంపాదించుకున్న ప్రముఖ గాయని, నృత్యకారిణి నాగదుర్గ, తాజాగా విడుదల చేసిన పాటతో మరోసారి రికార్డులు సృష్టిస్తున్నారు. ‘పేరుగ‌ల్ల పెద్దిరెడ్డి’ పేరుతో వచ్చిన ఈ కొత్త జానపద గీతం ప్రస్తుతం యూట్యూబ్‌లో మరియు సోషల్ మీడియా ప్లాట్‌ఫామ్‌లలో ట్రెండింగ్‌లో అగ్రస్థానంలో దూసుకుపోతోంది.
సాధారణంగా పల్లె జీవితాన్ని, తెలంగాణ సంస్కృతిని ప్రతిబింబించే పాటలతో ప్రేక్షకులను ఆకట్టుకునే నాగదుర్గ, ఈసారి తండ్రి-కూతుళ్ల అనుబంధాన్ని ప్రధానంగా తీసుకున్నారు. తండ్రిపై కూతురు చూపించే అపారమైన ప్రేమను తెలిపే భావోద్వేగపూరితమైన సందర్భాన్ని పాట రూపంలో ఆవిష్కరించారు. ఈ పాటలోని పల్లెటూరి వాతావరణం, సులువుగా పలకగలిగే జానపద లయ సినీ ప్రేక్షకులకు, ఫోక్ సాంగ్స్ అభిమానులకు బాగా కనెక్ట్ అయ్యింది.
ఈ పాట శుక్రవారం రోజున విడుదలైంది. విడుదలైన కొద్ది గంటల్లోనే పాట మిలియన్ల కొద్దీ వీక్షణలను సాధించి, యూట్యూబ్ ట్రెండింగ్ లిస్ట్‌లో నిలిచింది. ఈ అనూహ్య విజయం నాగదుర్గ ఖాతాలో మరో క్రేజీ హిట్‌గా నమోదైంది. ఎప్పటిలాగే, ఈ పాటలో నాగదుర్గ చేసిన ఎనర్జిటిక్ డ్యాన్స్ పర్ఫార్మెన్స్ ప్రధాన ఆకర్షణగా నిలిచింది. ఆమె తనదైన ప్రత్యేక శైలిలో చేసిన నృత్యం ప్రేక్షకులను కట్టిపడేస్తోంది. పల్లె జానపద పాటలను ఇష్టపడే అభిమానుల్లో ఈ పాట విపరీతమైన క్రేజ్‌ను సొంతం చేసుకుంది.
ఈ విజయవంతమైన జానపద గీతానికి ‘బుల్లెట్ బండి’ పాటతో సుపరిచితులైన లక్ష్మణ్ అద్భుతమైన సాహిత్యాన్ని అందించగా, గాయని మమత రమేష్ తన మధుర గాత్రంతో ప్రాణం పోశారు. ఈ పాటకు మదన్ కే సంగీతం సమకూర్చారు. ఈ ముగ్గురి ప్రతిభ, నాగదుర్గ ప్రదర్శన కలగలిసి ‘పేరుగ‌ల్ల పెద్దిరెడ్డి’ పాటను సూపర్ హిట్ చేశాయి.