Vijay Deverakonda: ‘రౌడీ జనార్దన’ మూవీకి ముహూర్తం ఖరారు.. విలన్‌ పాత్రలో బాలీవుడ్ స్టార్?
Vijay Deverakonda: యంగ్ సెన్సేషన్ విజయ్ దేవరకొండ గత కొంతకాలంగా వరుస సినిమాలు చేస్తున్నప్పటికీ, అనుకున్న స్థాయిలో విజయాలు మాత్రం దక్కడం లేదు. ‘ఖుషి’, ‘ఫ్యామిలీ స్టార్’ వంటి చిత్రాలు అభిమానుల అంచనాలను అందుకోలేకపోయాయి. దీంతో కాస్త డీలా పడిన విజయ్, తదుపరి చిత్రంతో ఎలాగైనా బ్లాక్‌బస్టర్ హిట్‌ను సొంతం చేసుకుని తన మార్కెట్‌ను నిలబెట్టుకోవాలని పట్టుదలగా ఉన్నాడు. ప్రస్తుతం ఆయన చేతిలో ఉన్న రెండు ప్రాజెక్టుల్లో ఒకటైన ‘రౌడీ జనార్దన’పైనే ఇప్పుడు అందరి దృష్టి ఉంది.
‘రౌడీ జనార్దన’ చిత్రం ప్రముఖ నిర్మాణ సంస్థ శ్రీ వెంకటేశ్వర క్రియేషన్స్ (SVC) బ్యానర్‌లో 49వ చిత్రంగా రూపొందనుంది. ‘రాణివారు రాజావారు’ ఫేమ్ రవికిరణ్ కోలా ఈ సినిమాకు దర్శకత్వం వహిస్తున్నారు. తన తొలి సినిమాను క్లాస్‌గా తెరకెక్కించిన ఈ దర్శకుడు, విజయ్ దేవరకొండతో మాత్రం అవుట్ అండ్ అవుట్ యాక్షన్ బ్యాక్‌డ్రాప్‌లో ఈ చిత్రాన్ని రూపొందించడం విశేషం.
నిజానికి, ఈ సినిమా పూజా కార్యక్రమాలను దసరా సందర్భంగా నిర్వహించాలని మేకర్స్ ముందుగా ప్లాన్ చేశారు. కానీ, కొన్ని అనివార్య కారణాల వల్ల ఆ కార్యక్రమాన్ని వాయిదా వేయాల్సి వచ్చింది. ఇప్పుడు, సినిమా ముహూర్తం తేదీని అధికారికంగా ఖరారు చేశారు. ఈ నెల అక్టోబర్ 11న ‘రౌడీ జనార్దన’ పూజా కార్యక్రమాలు నిర్వహించనున్నారు. అనంతరం అక్టోబర్ 16వ తేదీ నుండి రెగ్యులర్ షూటింగ్ ప్రారంభం కానుంది.
ఈ సినిమాలో విజయ్ దేవరకొండకు జోడీగా స్టార్ హీరోయిన్ కీర్తి సురేష్ నటించనుంది. మరో ఆసక్తికర అంశం ఏమిటంటే, ఈ చిత్రంలో ప్రతినాయకుడి పాత్ర కోసం ఒక ప్రముఖ బాలీవుడ్ నటుడి పేరును పరిశీలిస్తున్నట్లు సమాచారం. యాక్షన్ ఎంటర్‌టైనర్‌గా రాబోతున్న ఈ సినిమాతో విజయ్ దేవరకొండ తిరిగి ఫామ్‌లోకి వస్తాడని ఆయన అభిమానులు నమ్మకంతో ఉన్నారు.