స్త్రీ, పురుషులు సమానమే అని ఎంత వాదించిన కొన్ని విషయాల్లో ఇద్దరూ వేరువేరు అని ఒప్పుకోక తప్పదు. స్త్రీ శారీరక వ్యవస్థ, అవసరాలు వేరు. అందుకే ఈ విషయాన్ని దృష్టిలో పెట్టుకొని ఫెమ్‌టెక్‌ (ఫెమినైన్‌ టెక్నాలజీ) మహిళల కోసం కొన్ని యాప్స్ రూపొందించాయి. ఆసియా దేశాల్లో దూసుకుపోతున్న ఫెమ్‌టెక్‌ కంపెనీల్లో 5% కంపెనీలు మనదేశానికి చెందినవే కావడం విశేషం. పీరియడ్‌ ట్రాకింగ్‌ యాప్‌ ‘క్లూ’ను ఆవిష్కరించిన తయిదా అనే యువతి ఫెమ్‌టెక్‌ అనే మాటను వెలుగులోకి తెచ్చారు.
‘ఇప్పటికీ ఫెమ్‌టెక్‌ ఇండస్ట్రీ మొగ్గదశలోనే ఉంది. మాలాంటి కొన్ని స్టార్టప్స్‌ ఈ రంగంలో పని చేస్తున్నా, జరగాల్సింది ఎంతో ఉంది’ అంటారు ఐంద్రా సిస్టమ్స్‌ ఫౌండర్‌ ఆదర్శ్‌ నటరాజన్‌. బెంగళూరుకు చెందిన నటరాజన్‌ మహిళల్లో తొలిదశలోనే గర్భాశయ క్యాన్సర్‌ను గుర్తించేందుకు వీలుగా “ఆర్టిఫీషియల్‌ ఇంటెలిజన్స్‌ స్క్రీనింగ్‌ సిస్టమ్‌”ను రూపొందించారు. ఇలాంటివే మరికొన్ని..
అప్రిసిటీ (Apricity):
రకరకాల కారణాలతో సంతానలేమితో ఇబ్బంది పడుతున్న వారికి గర్భధారణ మార్గాలను బోధిస్తుంది ఈ యాప్‌. ఆ తర్వాత కూడా.. పండంటి బిడ్డను
కనేదాకా.. ప్రతిదశలో కాబోయే తల్లి తీసుకోవాల్సిన జాగ్రత్తలను నేర్పిస్తుంది.
మాయా (Maya):
ఇది మహిళలకు డిజిటల్‌ అసిస్టెంట్‌లా పనిచేస్తుంది. గైనకాలజిస్టుల అపాయింట్‌మెంట్స్‌ ఖరారు చేస్తుంది. మానసిక సమస్యలకు కౌన్సెలింగ్‌ ఇప్పిస్తుంది.
హెల్త్‌ సాథీ(Health sathi):
మహిళ తన ఆరోగ్యం గురించే కాదు, కుటుంబసభ్యుల క్షేమం గురించీ ఆలోచించాలి. ఆ ప్రయత్నంలో సహకరించే అప్లికేషన్‌ ఇది.