పుస్తక ప్రియులకు అత్యంత ఇష్టమైన జాతీయ పుస్తక మహోత్సవం హైదరాబాద్లో మళ్లీ ప్రారంభమైంది. 35వ జాతీయ పుస్తక ప్రదర్శన ఇవాళ సాయంత్రం ఎన్టీఆర్ స్టేడియంలో మొదలైంది. ఇందులో రాష్ట్ర, జాతీయ స్థాయిలో పేరొందిన పుస్తక సంస్థలు పాల్గొననున్నాయి. నేటి నుంచి వచ్చే నెల 1వరకు కొనసాగుతుందని నిర్వాహకులు ప్రకటించారు. ఎన్టీఆర్ స్టేడియం వేదికగా సుమారు 340 స్టాల్స్తో ప్రారంభమైంది. మధ్యాహ్నం 2 గంటలల నుంచి రాత్రి 8.30 గంటల వరకు శని, ఆది, ఇతర సెలవు దినాల్లో మధ్యాహ్నం ఒంటి గంట నుంచి రాత్రి 9 గంటల వరకు ఈ బుక్ ఫెయిర్ కొనసాగుతుంది.
పాఠశాల విద్యార్థులకు, జర్నలిస్టులకు గుర్తింపు కార్డు చూపితే ఉచిత ప్రవేశం ఉంటుంది. ఆంధ్రప్రదేశ్, తెలంగాణ రాష్ట్రాల నుంచే కాకుండా కర్ణాటక, తమిళనాడు నుంచి సుమారు 10 లక్షల మంది పాఠకులు వస్తారని బుక్ ఫెయిర్ నిర్వాహకులు అంచనా వేస్తున్నారు. మొదటి రోజు మంత్రులు కేటీఆర్, సబితా ఇంద్రారెడ్డితో పాటు పత్రికల సంపాదకులు, తెలంగాణ మీడియా అకాడమీ ఛైర్మన్ అల్లం నారాయణ హాజరుకానున్నారు. వారి చేతుల మీదుగానే బుక్ ఫెయిర్ గ్రాండ్గా ప్రారంభం కానుంది.
సీఎం పేరుతో స్పెషల్ స్టాల్:
కాగా 35వ బుక్ ఫెయిర్లో సీఎం కేసీఆర్ పేరిట కూడా ఓ ప్రత్యేక స్టాల్ కూడా ఏర్పాటు చేయనున్నారు. సీఎం కేసీఆర్ పై వివిధ రచయితలు రాసిన పుస్తకాలు, ఉద్యమ ప్రస్థానం, ప్రభుత్వ పాలన, సంక్షేమ పథకాలకు సంబంధించిన పుస్తకాలను ఈ స్టాల్లో ప్రదర్శనగా ఉంచనున్నారు. ఇక వివిధ రకాల పోటీ పరీక్షలకు సిద్ధమవుతున్న అభ్యర్థులకు కావాల్సిన పుస్తకాలు కూడా ఇక్కడ లభించనున్నాయి. ఇక పుస్తక ప్రియులను అలరించేందుకు ప్రతిరోజూ సాయంత్రం వివిధ సాంస్కృతిక కార్యక్రమాలు నిర్వహించనున్నారు.